ස්වභාවධර්මය, ඉතිහාසය සහ මරණය තේමා කොට ගනිමින් කවි ලියූ ස්වීඩන ජාතික කවියකු වන තොමාස් ට‍්‍රාන්ස්ට්‍රෝමර් මෙම වසරේ නොබෙල් සාහිත්‍ය සම්මානයෙන් පිදුම් ලැබුවේය. අසූ හැවිරිදි වියෙහි පසුවන මනෝවිද්‍යාඥයකු ද වන ට‍්‍රාන්ස්ට්‍රෝමර් උපන්නේ 1931 වසරේදී ස්වීඩනයේ ස්ටොක්හෝම් නුවරදීය. 1954 වසරේදී පළ කෙරුණු ‘සෙවන්ටීන් පොයම්ස්’ ට‍්‍රාන්ස්ට්‍රෝමර්ගේ ප‍්‍රථම පද්‍ය සංග‍්‍රහය වේ. ඊට අමතරව 1962 දී හාෆ් ෆිනිෂ්ඞ් හෙවන්, 1966 වසෙර් දී වින්ඩෝස් ඇන්ඞ් ස්ටෝන්ස්, 1970 වසරේදී ටුවෙන්ටි පොයම්ස් සහ 2010 වසරේදී සොරෝ ගොන්ඩෝලා නමැති පද්‍ය සංග‍්‍රහ හරහා ට‍්‍රාන්ස්ට්‍රෝමර් විචාරකයන්ගේ පැසැසුමට ලක් විය. ස්වීඩන බසින් පළ කෙරුණු ඔහුගේ නිර්මාණ නොයෙක් ලේඛකයන් ඉංග‍්‍රිසියට පරිවර්තනය කර ඇත. මනස සහ බාහිර ලෝකය අතර ඇති සබඳතාවෙහි ස්වරූපය කෙරෙහි අවදානය යොමු කරමින් චිත්ත රූප මැවෙන ආකාරයෙට කාව්‍යමය කෘතීන් රචනා කරන කවියකු ලෙසද ට‍්‍රාන්ස්ට්‍රෝමර් ප‍්‍රකටය. ආබාධිත පුද්ගලයින්, අපරාධවලට සම්බන්ධ වී සිරදඬුවම් විඳින්නන්, මත්ද්‍රව්‍යවලට ඇබ්බැහිවූවන් පුනරුත්තාපනය කිරීමට ද ට‍්‍රාන්ස්ට්‍රෝමර්, මනෝ විද්‍යාඥයකු ලෙස දායක වී ඇතැයිද පැවසේ.