තලේබාන් සටන්කාමීන් ඇෆ්ගනිස්තානයේ කාබුල් අගනුවර නේටෝ හමුදා බස් රියක් ඉලක්ක කර ගනිමින් ඊයේ (30) එල්ල කළ මරාගෙන මැරෙන බෝම්බ ප‍්‍රහාරයෙන් බසයේ ගමන් කරමින් සිටි ඇමෙරිකන් සෙබළුන් 13 දෙනකු ඇතුළු 17 දෙනෙක් ජීවිතක්ෂයට පත්වූහ. මෙය ඇෆ්ගන් අගනුවරදී නේටෝ සහ ඇමෙරිකන් හමුදා ඉලක්ක කර ගනිමින් තලේබාන් සටන්කාමීන් එල්ල කළ දරුණුතම ප‍්‍රහාරයක් යැයි ඇමෙරිකාව පවසයි. ප‍්‍රහාරයෙන් මියගිය සෙසු පිරිස ඇෆ්ගන් හමුදා සෙබළුන්ය. තලේබාන් මරාගෙන මැරෙන බෝම්බකරු පුපුරණ ද්‍රව්‍ය පුරවාගත් වෑන් රථයකින් වේගයෙන් පැමිණ බසයේ හැපී ඇතැයි ඇෆ්ගන් ආරක්ෂක අංශ පවසයි. බෝම්බකරු පැමිණි වෑන් රියේ පුපුරණ ද්‍රව්‍ය කිලෝ ග‍්‍රෑම් 700 ක් තිබෙන්න ඇතැයි පිපිරුම සිදුවූ ස්ථානය පරීක්ෂාවට ලක් කළ ආරක්ෂක අංශ නිලධාරීහු පවසති. බස්රිය බෝම්බ ප‍්‍රහාරයට හසුවූයේ එය කාබුල් නුවර ඇමෙරිකන් සරසවිය අසලින් ගමන් කරමින් තිබියදීය. එම බස්රිය වෙඩි නොවදින බස්රියක් වූ නමුත් බෝම්බ ප‍්‍රහාරයට හසුවීමෙන් එය සම්පූර්ණයෙන්ම විනාශ වී ඇති බවද ආරක්ෂක අංශ වැඩි දුරටත් කියා සිටියි. ප‍්‍රහාරය සිදුවෙද්දී මාර්ගය අසල ගමන් කරමින් සිටි ඇෆ්ගන් සිවිල් වැසියන් අට දෙනෙකු, කුඩා දරුවන් සිවුදෙනකු තුවාල ලැබූ බවත් ඔවුන් කඩිනමින් රෝහල් ගත කළ බවත් වාර්තා වේ. එම බෝම්බ ප‍්‍රහාරය සිදුවීමට පැය කිහිපයකට පෙර ඇෆ්ගනිස්තානයේ හමුදා මෙහෙයුම්වල යෙදී සිටින  ඕස්ටේ‍්‍රලියානු ජාතික හමුදා සෙබළු තිදෙනෙක් ද තලේබාන් මරාගෙන මැරන බෝම්බකරුවකුගේ ප‍්‍රහාරයකට බිලි වූහ. එම සෙබළුන් තිදෙනා සමඟ සිටි භාෂා පරිවර්තකයා ද ජීවිතක්ෂයට පත්වූ බව ආරක්ෂක අංශ නිවේදනය කරයි.