හියුගෝ චාවේස්ගේ අභාවයෙන් පසු, ලබන 14 වැනිදා පැවැත්වීමට නියමිත මහ මැතිවරණයට ඉදිරිපත් වන එරට භාරකාර ජනපති නිකලස් මදුරෝ ඊයේ (9) මටුරීන් නුවර පැවැති ජන රැලියකදී කියා සිටියේ රටේ දූෂණ වංචාවලට තමන් කිසිදු ඉඩක් ලබා නොදෙන බවත් ඊට එරෙහිව සටන් කිරීමට තමා දිවි හිමියෙන් කටයුතු කරන බවත්ය.
මියයෑමට පෙර තම අනුප‍්‍රාප්තිකයා ලෙස ද චාවේස් නම් කළේ මදුරෝය. ඔහු වෙනිසියුලාවේ උප ජනපති ධුරය ද හෙබවීය. ඔහු වෙනිසියුලාවේ භාරකාර ජනපති ධුරයට පත් වූයේ චාවේස්ගේ අභාවයෙන් පසුවය.
දූෂණ වංදාවලට එරෙහි වෙන බව මදුරෝ පොරොන්දුවක් ලබා දුන්නේ ලබන මැතිවරණයේදී ඔහුගේ ප‍්‍රතිවාදී අපේක්ෂක මෙන්ම විපක්ෂ නායකයා ද වන හෙන්රීකේ කැප්රිලේ කළ ප‍්‍රකාශයකට පිළිතුරු දෙමිනි. කැප්රිලේ පෙරේදා පැවැත්වූ ජන රැලියේදී කියා සිටියේ රටේ දූෂණ වංචා ඉහවහා ගොස් ඇති බවය.
ඉකුත් ඔක්තෝබරයේ පැවැති ජනපතිවරණයේදී වාචේස්ගේ ප‍්‍රතිවාදියා වූයේ ද කැප්රිලේය. එම මැතිවරණයෙන් චාවේස් සියයට 54.42 ක ඡන්ද ප‍්‍රතිශතයක් හිමිකරගත් අතර කැප්රිලේට හිමිකර ගැනීමට හැකිවූයේ සියයට 44.97 ක ඡන්ද ප‍්‍රතිශතයකි. වෙනිසියුලාවේ බටහිර පළාත් කැප්රිලේට සහාය පළ කළ අතර ඇමෙරිකාවේ සහාය ද හිමිවූයේ ඔහුටය.