නොකඩවා ඇදහැලෙන මහ වැසි හේතුවෙන්, අද (11) සවස් වනවිට තායිලන්තයේ බැංකොක් අගනුවර මුළුමනින්ම ජලයෙන් යටවීමේ අවදානමක් ඇතැයි බලධාරීහු බිය පළ කරති. බැංකොක් නුවරට අමතරව තායිලන්තයේ පළාත් රැුසක් මේවනවිට ජලයෙන් යටවී ඇති අතර ගැලීම් සහ නායයෑම් හේතුවෙන් 250 දෙනකු ජීවිතක්ෂයට පත්ව ඇතැයි වාර්තාවේ. මිලියන 12 කට වැඩි පිරිසකට උන්හිටිතැන් අහිමි වී ඇත. තායිලන්තයට මෝසම් වැසි සමය උදා වූයේ මීට මාස දෙකකට පෙරය. එදා සිට මේ දක්වාම නොකඩවා මහ වැසි ඇද හැලෙමින් පවතී. තායිලන්ත අගමැතිනී යිංග්ලක් ෂිනවාත‍්‍රා ජාතිය අමතමින් කියා සිටියේ දශක ගණනාවකට පසු තායිලන්තය මුහුණ දුන් දරුණුතම ජල ගැලීම් තත්ත්වය මෙය බවය. ”ජල ගැලීම් නිසා මුළු මහත් තායිලන්තය පීඩාවට පත්වී සිටිනවා. විපතට පත්වූවන්ට සහනාධාර ලබා දීම කඩිනමින් සිදුවෙනවා” යැයි ද තායිලන්ත අගමැතිනිය වැඩි දුරටත් කියා සිටියාය. බැංකොක් නුවරට මහ වැසි ඇදහැලීම ආරම්භ වූයේ ඉකුත් සිකුරාදා (7) ය. ඊයේ (9) වනවිට බැංකොක් නුවර ප‍්‍රධාන මාර්ග රැසක් ජලයෙන් යටවීමෙන් ගමනාගමන කටයුතු මුළුමනින්ම අඩපණ වී තිබුණි. බැංකොක් ගුවන්තොටුපොළ ද වසා දැමීමට බලධාරීහු තීරණය කර ඇතැයි ද වාර්තා විය. විපත පත්වූවන්ට අධාර ලබා දීමටත් ජලගැලීම් හේතුවෙන් කොටුවී සිටින පිරිස් බේරා ගැනීමටත් හමුදාව යොදාවා ඇතැයි වාර්තා වේ. කාලගුණ විද්‍යා දෙපාර්තමේන්තුව අනතුරු අඟවමින් කියා සිටියේ ඉදිරි සතිය පුරාම තායිලන්තයට මහ වැසි ඇද හැලෙනු ඇති බවය.