චාවේස් මියගියේ වෙනිසියුලාවේ දී නොව, කියුබාවේ හවානා නුවරදී පිළිකා සැත්කමට භාජන වූ අවස්ථාවේ දී යැයි වෙනිසියුලානු විපක්ෂ දේශපාලන කි‍්‍රයාකාරීහු පවසති.
සැත්කමින් පසු පෙනහලු ආසාදනයකට ලක්වී චාවේස් මියගියේ කියුබාවේදී බවත් ඉකුත් 18 වැනිදා ඔහු වෙනිසියුලාවට ගෙනා බව රජය පවසද්දී පවා ඔහු මියගොස් සිටි බවත් රජයේ විශ්වාස කටයුතු ආරංචි මාර්ග ඔස්සේ තමන්ට දැනගැනීමට හැකිවිණැයි විපක්ෂ දේශපාලන කි‍්‍රයාකාරීහු පවසති.
උප ජනපතිව සිටි මදුරෝට බලය පවරා දී, කියුබාවේ හවානා නුවරට ගිය චාවේස් සිව් වැනි වරට පිළිකා සැත්කමට භාජන විය. වෛද්‍යවරුන් පැවැසූ ආකාරයටම සැත්කම ඉතා අවදානම් එකක් විය. සැත්කමින් පසු චාවේස් පෙනහලූ ආසාදනයකට ද ලක් වී ස්වසන අපහසුතාවකින් පෙළුණේය. එම අවස්ථාවේදී ඔහු ස්වසන යන්ත‍්‍රයකට සම්බන්ධ කෙරුණි. ඉන්පසු චාවේස්ට කතා කිරීමට නොහැකි වූ අතර, ඔහු ආහාර ගත්තේත් හුස්ම ගත්තේත් බටයක ආධාරයෙනි.
නව ධුර කාලය සඳහා චාවේස් දිවුරුම් දීමට නියමිතව සිටියේ ඉකුත් ජනවාරි 10 වැනිදාය. රෝහල් ගත ව සිටි නිසා ඒ අවස්ථාව ඔහුට මඟ හැරුණි.
වෙනිසියුලාවට පැමිණි පසු චාවේස් හමුදා රෝහලකට ඇතුළත් කෙරුණි. සම්පූර්ණ සුවය ලැබීමට නම් වෙනිසියුලානු නායකයාට තව සති කිහිපයක් රෝහල් ගතව සිටීමට සිදුවේ යැයි වෛද්‍යවරුන් පැවැසූ බව වෙනිසියුලා උප ජනාධිපති මදුරෝ එම අවස්ථාවේදී කියා සිටියේය.
වෙනිසියුලාවේ අසල්වැසියකු වන බොලිවියාවේ ජනාධිපති ඊවෝ මොරාලේස්, ඉකුත් පෙබරවාරි 23 වැනිදා චාවේස්ගේ සුවදුක් බැලීමට වෙනිසියුලාවට ගියේය. එහෙත් ඔහුට චාවේස් හමුවීමට යෑමට පවා  වෙනිසියුලා බලධාරීහු අවසර නොදුන්හ.