චීන රජයට එරෙහි මතවාද ඉදිරිපත් කිරීම හේතුවෙන්, රජයේ උදහසට ලක්වූ, අන්ධ නීතිවේදියකු වන චෙන් ගුවන්චෙන්ට සහ ඔහුගේ පවුලේ අයට ඇමෙරිකාවට යෑමට චීන රජයෙන් ගුවන් ගමන් බලපත‍්‍ර හිමි වූ අතර ඔවුහු පෙරේදා (19) ඇමෙරිකාව බලා පිටත්ව ගියහ. චෙන් ගුවන්චෙන් (40) මානව කි‍්‍රයාකාරියකු ද වෙයි. චීන රජය පසුගිය වසර කිහිපයක් තිස්සේ ඔහු නිවාස අඩස්සියට පත් කළේය. එහෙත් ඉකුත් මැයි 7 වැනිදා, ආධාරකරුවන්ගේ උදව් ඇතිව චෙන් ගුවන්චෙන් චීනයේ බීජීං නුවර ඇමෙරිකා තානාපති කාර්යාලයට ගොස් ඇමෙරිකා රජයේ ආරක්ෂාව පැතුවේය. ඔහු ඇමෙරිකාවෙන් ඉල්ලා සිටියේ තමා ඇමෙරිකාවට ගෙන්වා ගන්නා ලෙසය. කෙසේ නමුත් ඇමෙරිකා රජය එය ප‍්‍රතික්ෂේප කළ අතර චෙන් ගුවන්චෙන් යළි චීන බලධාරීන් අතට පත්විය. එම අවස්ථාවේදී ඔහු අත්අඩංගුවට ගත් පොලිස් නිලධාරීන් ඔහුට ඉතා කුරිරු ලෙස පහර දුන් අතර දින කීපයක් රෝහලේ සිටීමට ද ඔහුට සිදුවිය. නිවාස අඩස්සියෙන් පලා යෑමට පළි ගැනීමක් ලෙස චෙන් ගුවන්චෙන්ගේ ඥාති පුත‍්‍රයකුට එරෙහි මිනීමැරුම් චෝදනා ද එල්ල කිරීමට පොලිස් නිලධාරීන් කටයුතු කළ බව වාර්තා විය. චෙන් ගුවන්චෙන් ඔහුගේ බිරිය සහ පුතා පෙරේදා චීනයේ බීජීං නුවර ජාත්‍යන්තර ගුවන්තොටුපොළේ සිට ඇමෙරිකාවේ නිව්යෝක් නුවර බලා පැමිණි බව විදෙස් මාධ්‍ය වාර්තා කර තිබුණත් චීන බලධාරීන් ඒ ගැන කිසිදු ප‍්‍රකාශයක් සිදු කර නොමැත.