නිව්යෝර්ක් නගරය ආසන්නයේ පිහිටි නිව්ටවුන් නගරයේ පසුගියදා කුඩා දරුවන් අමානුෂික ලෙස ඝාතනය කිරීමේ සිදුවීමත් සමඟ රට තුළ ගිනිඅවි පාලනය කළ යුතු බවට ඇමෙරිකා සෙනෙට් සභිකයන් මෙන්ම ජ්‍යෙෂ්ඨ දේශපාලනඥයන් දැඩි ලෙස අවධාරණය කරයි. ගිනිඅවියක් තමා සන්තකයේ තබා ගැනීම ඇමෙරිකානු ජාතිකයකුට ව්‍යවස්ථාවෙන් ලැබෙන නීතිමය හිමිකමකි. එසේ වූවත් ගිනිඅවි නිසා සාමාන්‍ය ජනතාවගේ ජීවිත දැඩි අවදානමකට බඳුන්ව ඇති නිසා ‘‘ගිනිඅවි පිළිබඳ නීති සහ එම සංස්කෘතිය’’ වෙනස් කරන්නේ කෙසේද යන්න පිළිබඳව ඇමෙරිකානු නීතිවේදීන් මේ සතියේදී සාකච්ඡුා කිරීමට බලාපොරොත්තු වන බව ඩිමොක‍්‍රටික් පාක්ෂික සෙනෙට් සභික නායක හැරී රීඞ් පැවැසීය. ඛේදජනක සිදුවීමත් සමඟ ජනපති ඔබාමා ද අවධාරණය කර කියා සිටියේ රට තුළ සිදුවන මිනිස් ඝාතන වහා අවසන් කළ යුතු බවයි. මේ අතර ඩිමොක‍්‍රටික් පාක්ෂික සෙනෙට් සභිකයන් මෙන්ම රිපබ්ලිකන් පාක්ෂික සෙනෙට් සභිකයන් බොහෝදෙනෙක් ගිනිඅවි නීතිය වෙනස් කිරීමේ අවශ්‍යතාව පිළිබඳව අදහස් දක්වා ඇති බව විදෙස් මාධ්‍ය වාර්තා සඳහන් කරයි. ඇමෙරිකාවේ ගිනිඅවි භාවිතය නිසා වසරකට ඝාතන 30,000ක් පමණ සිදුවන අතර එය පාලනය කිරීමට කඩිනම් පියවර ගන්නැයි නිව්යෝර්ක් නගරාධිපති මයිකල් බ්ලූම්බර්ග් ආරක්ෂක අංශවලට උපදෙස් දී ඇති බව වාර්තා වේ. මෙම ප‍්‍රචණ්ඩකි‍්‍රයා නැවැත්වීමට තමා යටතේ ඇති විධායක බලතල උපකාර කර ගැනීමට ජනපති ඔබාමා සූදානමින් සිටින බව නගරාධිපති බ්ලූම්බර්ග් පැවැසීය. වචනවලට අපගේ ජාතිය සුවපත් කළ නොහැකි අතර එය කළ හැක්කේ කි‍්‍රයාවෙන් පමණක් බව ඔහු වැඩිදුරටත් සඳහන් කළේය.