ලිබියාවේ කැරැල්ල උත්සන්න වූ අවස්ථාවේ රහසේ රටින් පිටවී, මොරොක්කෝවට පලා යෑමට උත්සහ කළ අවස්ථාවේ මුරුෂානියාවේ දී අත්අඩංගුවට පත්වූ ලිබියාවේ හිටපු නායක කර්නල් මුවම්මාර් ගඩාෆිගේ බුද්ධි අංශ ප‍්‍රධානී අබ්දුල්ලා අල් සෙන්සුයි පෙරේදා (5) යළි ලිබියාවට රැගෙන ආ අතර ලිබියා රජය පැවැසුවේ ඔහුට එරෙහි කඩිනමින් නඩු පවරන බවය. ලිබියාවේ සිට මුරුෂානියාවට ගොස් පසුව මොරොක්කෝවට පලා යෑමට අල් සෙන්සුයි උත්සහ කළේ මාලි රාජ්‍යයේ වැසියකු ලෙස ගුවන් බලපත‍්‍රයක් ඉදිරිපත් කරමින්ය. එහෙත් මුරුෂානියා ආරක්ෂක අංශ ඔහු කවුරුදැයි හඳුනාගෙන අත්අංගුවට ගත්තේය. එම අවස්ථාවේදී ලිබියා රජය ඔහු ඉල්ලා සිටි අතර, මුරුෂානියා රජය අල් සෙන්සුයි සම්බන්ධයෙන් නඩු විභාගයක් පැවැත්වීය. එම නඩු විභාගය අවසන් වූයේ සෙන්සුයි යළි ලිබියාවට බාර දෙන්නැයි තීන්දු කරමින්ය. ඒ අනුව පෙරේදා මුරුෂානියා ආරක්ෂක අංශ විශේෂ ගුවන් යානයකින් ඔහු ලිබියාවට රැගෙන ආ බව වාර්තා විය. ලිබියා කැරැල්ල උත්සන්න වූ අවස්ථාවේදී අහිංසක සිවිල් වැසියන් දහස් ගණනින් මරා දැමීමට අනුබල දී මනුෂ්‍යත්වයට එරෙහිව අපරාධ කළේ යැයි ජාත්‍යන්තර අපරාධ අධිකරණය අබ්දුල්ලා අල් සෙන්සුයිට ද චෝදනා කර ඇත. ගඩාෆි සහ ගඩාෆි වැඩිමල් පුතුට එරෙහිව ද ජාත්‍යන්තර අපරාධ අධිකරණයෙන් එම චෝදනා කර තිබේ. ගඩාෆි කැරැලිකරුවන් අතින් අමු අමුවේ ඝාතනය වූ අතර ගඩාෆි වැඩිමල් පුතු සෙයිෆ් අල් ඉස්ලාම් ලිබියාවෙන් පලා යෑමට තැත් කරද්දී කැරැලිකරුවන් අතට පත් විය. අල් ඉස්ලාම්ට එරෙහිව ද කඩිනමින් නඩු පවරන බව ලිබියා රජය පැවැසුවත් එය මෙතෙක් සිදු කර නැත. ජාත්‍යන්තර අපරාධ අධිකරණය අල් ඉස්ලාම් තමන්ට බාර දෙන්නැයි ඉල්ලා සිටිය ද ලිබියා රජය ඊට කැමැත්ත පළ කර නැත.