ඊජිප්තුවේ හමුදා පාලනය අවසන් කරන්නැයි බල කරමින්, එරට කයිරෝ අගනුවර තරීර් චතුරස‍්‍රයේ පැවැති විරෝධතා රැලියකට ආයුධ සන්නද්ධ පිරිසක් පෙරේදා (2) වෙඩි තැබීම නිසා  විරෝධතාකරුවන් 11 දෙනකු ජීවිතක්ෂයට පත්වූ අතර සියයකට වැඩි පිරිසක් තුවාල ලැබූහ. විරෝධතාවට දහසකට වැඩි පිරිසක් සහභාගී ව සිටියහ. ආයුධ සන්නද්ධ පිරිස් පැමිණ වෙඩි තබන්න පටන් ගත් අවස්ථාවේදී විරෝධතාකරුවන් සහ එම පිරිස අතර දරුණු ගැටුමක් හට ගැනිණ. කයිරෝ අගනුවර මෙම ගැටුම් හටගත්තේ ලබන 23 සහ 24 වැනිදා ජනාධිපතිවරණයක් පැවැත්වීමට නියමිතව තිබියදීය. එම දිනවල පැවැත්වෙන්නේ ජනපතිවරණයේ පළමු වටයයි. ඊජිප්තුවේ පාලනය, හමුදා පාලක මණ්ඩලයකට පැවැරුණේ ජනපති හොස්නි මුබාරක් බලයෙන් ඉවත් වීමෙන් පසුවය. හමුදා පාලක මණ්ඩලය එම අවස්ථාවේදී කියා සිටියේ කඩිනමින් ජනපතිවරණයක් පවත්වන බවය. එහෙත් එය දිනෙන් දින ප‍්‍රමා ද විය. කෙසේ නමුත් ලබන ජූලි මාසයේදී රටේ පාලන බලය ප‍්‍රජාතන්ත‍්‍රවාදී රජයකට භාර දෙන බව හමුදා පාලක මණ්ඩලය පවසා ඇත. පෙරේදා හටගත් ගැටුම් නිසා ඊට බාධාවක් එල්ල වීමේ අවදානමක් ඇතැයි ඊජිප්තු දේශපාලන විචාරකයෝ පෙන්වා දෙති. ගැටුම් නිසා ජනපතිවරණයට ඉදිරිපත් වීමට නියමිත ඇතැම් අපේක්ෂකයන් තම ප‍්‍රචාරක කටයුතු අත්හිටවූ බව ඊයේ (3) වාර්තා විය. තරීර් චතුරස‍්‍රයේ ගැටුම් හට ගත් අවස්ථාවේදී එය නතර කිරීමට හමුදාව මැළි වූ අතර පොලිසිය එම ස්ථානයට පැමිණ ඇත්තේ එදින සවස් වරුවේය.