කෙන්යා ජනාධිපති වරණයෙන් ජයගත් උහුරු කෙන්යාටාගේ ජයග‍්‍රහණය අභියෝගයට ලක් කරමින් නැවත ඡන්ද විමසීමක් පැවැත්විය යුතු බව පවසමින් එරට ශ්‍රේෂ්ඨාධිකරණය හමුවේ ගොනු කර තිබූ නඩුවේ තීන්දුව ප‍්‍රකාශයට පත් කළ අගවිනිසුරු විලි මුටුන්ගා ඊයේ(31) කියා සිටියේ කෙන්යාටාගේ ජයග‍්‍රහණය ශ්‍රේෂ්ඨාධිකරණය පිළිගන්නා බවයි. 

නව ජනපති උහුරු කෙන්යාටා

ඉකුත් මාර්තු 4 වැනිදා පැවැති කෙන්යානු ජනාධිපතිවරණය නිදහස් හා සාධාරණ ලෙස පැවැති බවත් එහි අවසන් ප‍්‍රතිඵල විනිවිදභාවයෙන් යුක්ත නිසා කෙන්යාටාගේ ජයග‍්‍රහණය තහවුරු වන බවත් අගවිනිසුරුවරයා වැඩිදුරටත් සඳහන් කළේය.
ඒ අනුව කෙන්යාවේ නව ජනාධිපතිවරයා ලෙස තේරී පත් වූ කෙන්යාටා ලබන අපේ‍්‍රල් 9 වැනිදා සිය ධූරයේ දිවුරුම්දීමට නියමිතය. 
අධිකරණ තීන්දුව ප‍්‍රකාශයට පත් කිරීමත් සමඟ කෙන්යාවේ නගර කිහිපයක හටගත් ගැටුම්වලින් දෙදෙනෙක් ජීවිතක්ෂයට පත්වූහ. කෙන්යාටාගේ ජයග‍්‍රහණයත් සමඟ විපක්ෂ කි‍්‍රයාකාරීන් හා පොලිසිය අතර ඇති වූ ගැටුම් මෙම නොසන්සුන් තත්ත්වයට හේතු වූ බව විදෙස් පුවත්සේවා පවසයි. 
අවසන් ඡුන්ද ප‍්‍රතිඵලවලට අනුව ජනාධිපතිවරණයෙන් ජය ගත්තේ උහුරු කෙන්යාටා ය. ඔහුගේ ප‍්‍රතිවාදියා ලෙස ජනපති ධූරයට තරග කළේ කෙන්යාවේ හිටපු අගමැති රයිලා ඔඩින්ගාය. 
 ජනාධිපතිවරණයේදී නොයෙක් අක‍්‍රමිකතා සිදු වූ බව පවසමින් එම ප‍්‍රතිඵල අභියෝගයට ලක් කරමින් රයිලා ඔඞ්න්ගා ඇතුළු සිවිල් සමාජ කණ්ඩායම් කිහිපයක් එකතුවී ශ්‍රේෂ්ඨාධිකරණයට පෙත්සමක් ඉදිරිපත් කළේ නැවත ජනාධිපතිවරණ ඡන්ද විමසීමක් පැවැත්විය යුතු බව අවධාරණය කරමිනි.
හිටපු අගමැති ඔඩින්ගා ශ්‍රේෂ්ඨාධිකරණයට ඉදිරිපත් කළ මෙම පෙත්සම හය දෙනකුගෙන් යුත් විනිසුරු මඩුල්ලක් විසින් ප‍්‍රතික්ෂේප කරන ලදී. 
ජනාධිපතිවරණ අවසන් ප‍්‍රතිඵලවලට අනුව කෙන්යාටා සියයට 50.7ක ඡන්ද ප‍්‍රතිශතයක් ලබා ඉදිරියට පැමිණියේය. දෙවනවර ඡුන්ද විමසීමක් පැවැත්වීමට නම් අපේක්ෂකයන් දෙදෙනාම සියයට 50ට අඩු ඡන්ද ප‍්‍රතිශතයක් ලබා ගත යුතුව තිබුණි.

ශ්‍රේෂ්ඨාධිකරණය ඉදිරිපිට විරෝධතාවල නිරත ඔඩින්ගා පාක්ෂිකයෝ