සමූහ අතවරයට ලක් වී මියගිය වෛද්‍ය ශිෂ්‍යාවගේ පෙම්වතා පෙරේදා (5) ඉන්දීය රූපවාහිනී නාලිකාවක් සමඟ සම්මුඛ සාකච්ඡාවකට එක් වෙමින් කියා සිටියේ ඇයට සිදු කළ එම අපරාධය වචනයෙන් විස්තර කළ නොහැකි බවය.
සම්මුඛ සාකච්ඡාවට සහභාගී වුව ද වෛද්‍ය ශිෂ්‍යාව මෙන්ම ඇයගේ පෙම්වතාගේ අනන්‍යතාව ද මෙතෙක් මාධ්‍ය හරහා අනාවරණය කර නැත.
පෙම්වතා එම සම්මුඛ සාකච්ඡුාව දුන්නේ ඉන්දියාවේ ‘සීටීවී’ නාලිකාවටය. ඇයගේ පෙම්වතා ද වෛද්‍ය ශිෂ්‍යයෙකි. ඔවුන් දෙදෙනා ලබන පෙබරවාරියේ විවාහ වීමට සූදානමින් සිට ඇත.
ඉකුත් 16 වැනිදා රාති‍්‍රයේ 23 හැවිරිදි වෛද්‍ය ශිෂ්‍යාව නවදිල්ලි නුවර බස්රියකදී එම බසයේ රියැදුරු ඇතුළු බසයේ ගමන් කළ හය දෙනකු අතින් දුෂණයටත් පහර කෑමටත් ලක් වෙද්දී ඇයගේ පෙම්වතාද ඇය සමඟ සිටියේය. ඔහු ද දරුණු ලෙස පහරකෑමට ලක් විය.
අතවරයට ලක් වී පහර කෑ ඇයත්, තමාත් එම පිරිස මහ මඟ දමා ගිය අවස්ථාවේ පැය කිහිපයක් යන තෙක් කිසිම කෙනකු තමන්ගේ පිහිටට නොපැමිණි බවත් සිහිය ආ පසු තමන් උදවු ඉල්ලා කෑ ගැසූ බවත් තරුණයා වැඩි දුරටත් කියා සිටියේය.
තරුණිය කෙලෙසූ  සැකකරුවන් හය දෙනාගෙන් පස් දෙනකු ඉකුත් 3 වැනිදා නවදිල්ලි අධිකරණය හමුවට ඉදිරිපත් කෙරුණු අතර ඔවුන්ට මිනීමැරුම් චෝදනා එල්ල විය.
එම පිරිස අතර බාලවයස්කාර තරුණයෙක් ද සිටී. එම තරුණයා සම්බන්ධයෙන් විශේෂ නඩු විභාගයක් පැවැත්වීමට ද නියමිතය. ශිෂ්‍යාව කෙලෙසීමෙන් පසු ඇයට අමානුෂික ලෙස යකඩ මුගුරකින් පහර දී ඇත්තේ ඇය දුෂණය කළ සැකකරුවන් සය දෙනා අතර සිටි එම බාලවයස්කාර තරුණයා යැයි පොලිස් පරීක්ෂණවලින් හෙළි වී ඇත.
තරුණියට එම අපරාධය කළ සය දෙනා එල්ලා මරා දමන්නැයි රජයට බල කරමින් දිගින් දිගටම විරෝධතා රැලි පැවැත්වෙයි. ඉන්දීය නීතිපතිවරයා පවසන්නේ හැඟීම්වලට වහල් නොවී නීතිය කඩිනමින් සහ අකුරට සිදු කරන බවය.