ඇමෙරිකා ජනාධිපති බරක් ඔබාමා අද ලෝකයේ කවුරුත් දන්නා හඳුනන කෙනෙක් බවට පත්ව ඇතිබව රහසක් නොවේ.

ගිය වසරේ ඇමෙරිකා ජනාධිපතිවරණයෙදී තම ඡන්දය පාවිච්චි කිරීමට ඡන්දපොළට ගිය ඔබාමාට සිදුවූ දෙයක් පිළිබඳ වීඩියෝ පටයක් මේ දවස්වල නැවත වතාවක් අන්තර් ජාලයට ඇතුළත් කර ඇත.

මෙය සිදුවුයේ ඔහුගේ ගම් පෙදෙස වන චිකාගෝ නුවරදීය. ඡන්ද මධ්‍යස්ථානයේ කාමරයට මුවපිරි සිනහවකින් යුතුව ඇතුළුවූ ඔබාමා එතන සිටි අයෙකුගෙන් ඡන්දය පාවිච්චිකිරීම පිළිබඳව විමසමින් එතන වැඩකටයුතු භාරව ඉන්නේ කවුදැයි ප්‍රශ්න කළේය.

ඔහු එතන වැඩකටයුතු භාර නිලධාරිනිය ඔබාමාට පෙන්වා සිටි පසු ඔබාමා " ඔව්‘‘ ඔව්‘‘ එයානම් ලොක්කෙක් බව පෙනෙනවා " කියමින් තමන් ගෙනා ඡන්ද ලිපිය මැතිවරණ නිලධාරිනියට ඉදිරිපත් කළේය. ඔහු කවුදැයි ඇය හොඳින්ම හඳුනා ගත් නමුත් ඡන්ද පත්‍රිකාව නිකුත්කිරීමට පෙර ඔබාමාගේ හැඳුනුම්පත ඉදිරිපත් කරන ලෙස ඇය ඔබාමාට කීවේය. තමාගෙන් හැඳුනුම්පත ඉල්ලා සිටීම සම්බන්ධයෙන් උරණ නොවූ බරක් ඔබාමා " හරි හරි කිසි අවුලක් නෑ"කියමින් තමන්ගේ සාක්කුවෙන් හැඳුනුම්පත පිටතටගෙන "ඔකේ තියෙන පින්තුර නම් ටිකක් පරණ ඇති. පෙන්නේ නැද්ද පැසුණ කෙස් ගස් එකක්වත් නැති හැටි" කියමින් පොඩි විහිළුවක්ද කළේය.

මෙම සිදුවීම ඔහුගේ තවත් සට කපට උපායශීලී හපන්කමක් වුවද මෙම සිදුවීම එදා ඇමෙරිකා ජනමාධ්‍යය පුරාම ප්‍රචාරය කැරුණේ බරක් ඔබාමාගේ මනුස්සකම විදහා පෙන්වන හොඳම අවස්තාවක් ලෙසය. එවර මැතිවරණය ජයග්‍රහණය කිරීමට එම සුබවාදී ප්‍රචාරයන් බෙහෙවින් උපකාරී වූබව මැතිවරණ ප්‍රතිපල විශ්ලේෂණය කළ බොහෝ දෙනා පැවසුහ.

ප්‍රශ්නය එය නොවේ. මෙම පරණ වීඩියෝ පටයක් මෙවෙලාවේ එළියට දැමීමේ හේතුව කුමක්ද කියා විවිධ පැතිවලින් විවිධ හේතුකාරණා සාකච්ඡා කිරීමට පටන්ගෙන ඇත. 

මේ සාකච්ඡාවල එක කොනක් කොරියා අර්බුදය වෙතටද හැරවී ඇත.

ලබන සතියේ කොරියා අර්ධද්වීපයයේ ඇවිලීමට ඉඩ ඇති යුදමය වාතාවරණය පිලිබඳ අසුබ ප්‍රචාරයන් පැතිරී යන අවස්තාවක බරක් ඔබාමාගේ මානුෂික පැතිකඩ පෙන්වන වීඩියෝපට අන්තර්ජාලය පුරා නැවත ප්‍රචාරය වන්නේ මොන හේතුවක් නිසාදෝ යයි ප්‍රශ්න කරන අයද සිටිති.

උතුරු කොරියා යුද තර්ජනය නිකම්ම නිකම් පුරසාරමක් බව එංගලන්තය අද පවසා ඇත. එනමුත් ඇමෙරිකාව මේ හරි බරි ගැහෙන්නේ උතුරු කොරියාවේ තර්ජනය විහිළුවක් ලෙස නොසලකා අවශ්‍ය වුවොත්  න්‍යෂ්ටික ප්‍රහාරයකට වූවද තමන් සතු  සියලු ශක්තිය යොදා ප්‍රතිප්‍රහාර එල්ලකිරීමේ බලාපොරොත්තුවෙන් බව ජාත්‍යන්තර ප්‍රවෘත්ති වාර්තා වල දැක්වෙයි.

එවැනි වාතාවරණයක් ඇතිවුවහොත් එහි සම්පුර්ණ වගකීම උතුරුකොරියා පාලක කිම් ජෝන් උන් වෙත පැවරීම ඇමෙරිකාවේ බලාපොරොත්තුවයි.

කොරියා නායකයාගේ කුරිරු බව පෙන්වාදෙන ගමන් ඇමෙරිකා ජනාධිපති බරක් ඔබාමාගේ උත්තම මානුෂික ස්වභාවය පෙන්වීමට මෙම පරණ වීඩියෝ  පටය මෙවෙලාවේ එළියට දැම්මාවත්දෝයි යන කුකුසුද සමහර අය අතර ඇතිබවද වාර්තාවී ඇත.