ඉන්දීය කාන්තාවන්ට සිදුවන අපරාධ සුළුකොට තැකිය නොහැකි බවත් ඔවුන්ගේ ආරක්ෂාව තහවුරු කිරීමට ඉන්දීය රජය යුහුසුළුව කටයුතු කරනු ඇති බව තම විශ්වාසය බවත් ටිබෙට් ආධ්‍යාත්මික නායක දලයි ලාමා පවසයි.
ටිබෙටයෙන් පිටුවහල් වී ඉන්දියාවේ ධර්මශාලාහි ජීවත් වන දලයි ලාමා මේ බව කියා සිටියේ ජායිපූර්හි පැවැත්වෙන ආසියානු සාහිත්‍ය උළෙලට සහභාගී වී විශේෂ දේශනයක් පැවැත් වූ අවස්ථාවේදීය.
ආසියාවේ විශාලතම සාහිත්‍ය උළෙල ලෙස සැලකෙන්නේ ජායිපූර් සාහිත්‍ය උළෙලයි. දලයි ලාමා ඊට සහභාගී වූ පළමු අවස්ථාව මෙයයි. ඔහුගේ දේශනය ඇසීමට 4,000 කට වැඩි පිරිසක් පැමිණ සිටි බව ද වාර්තා වේ.
දේශනය අවසානයේදී මාධ්‍යවේදීන් දලයි ලාමාගෙන් ප‍්‍රශ්න කිරීමට පටන් ගත් අවස්ථාවේදී එක් මාධ්‍යවේදියකු ඇසුවේ ස්තී‍්‍ර දුෂකයන්ට මරණ දඬුවම ලබා දිය යුතු නැද්ද යන්නයි.
"බොම්බේ සහ නවදිල්ලි යන නගරවල කාන්තාවන්ට අපරාධ බහුලව සිදුවෙනවා. මුලදී මේ ගැන කිසිවෙක් උනන්දු වුණේ නැහැ. ඒත් වෛද්‍ය ශිෂ්‍යාවට සිදුවූ අපරාධයෙන් පසුව ඒ ගැන කාගේත් ඇස් ඇරිලා. මෙවැනි අපරාධ සුළුකොට තකන්න බෑ. කාන්තාවන් වෙනුවෙන් විශේෂ ආරක්ෂාවක් ලබා දීමට ඉන්දීය රජය කටයුතු කරාවි. මට ඒක විශ්වාසයි.” යැයි දලයි ලාමා පැවැසීය.