උතුරු කොරියාව සිය ප‍්‍රහාරක අවි යුද්ධයකට සූදානම් අයුරින් ස්ථානගත කර ඇති බවත් ඒ්වා සූදානම් කර ඇත්තේ ඇමෙරිකාවට අයත් හවායි හා ගුවාම් යන දූපත්වලට ප‍්‍රහාර එල්ල කිරීමේ අරමුණින් බවත් උතුරු කොරියා හමුදාව පවසයි.
කොරියා මහජන හමුදාවේ ජ්‍යෙෂ්ඨ අණදෙන නිලධාරියා ප‍්‍රකාශයක් නිකුත් කරමින් කියා සිටියේ ආසියා පැසිෆික් කලාපයේ  ඇමෙරිකා හමුදා කඳවුරු පිහිටි හවායි හා ගුවාම් යන දූපත්වලට පහරදීමට තම හමුදාව සූදානමින් සිටින බවයි.
ඉකුත් දෙසැම්බර් මාසයේදී රොකට්ටුවක් අභ්‍යවකාශගත කිරීමට උතුරු කොරියාව සමත්විය. නමුත් ඇමෙරිකාව ප‍්‍රමුඛ බටහිර රටවල් චෝදනා කරන්නේ එය රොකට්ටුවක් නොව දිගු දුර මිසයිලයක් බවයි.
මේ අතර, ඇතැම් න්‍යෂ්ටික විශේෂඥයන් පවසන්නේ උතුරු කොරියාව ඇමෙරිකාවට ප‍්‍රහාර එල්ල කළ හැකි අන්තර් මහාද්වීපික බැලස්ටික මිසයිලයක් නිපදවා ඇති බවයි.
උතුරු කොරියාව සතු මැදි දුර මිසයිලවලට ඇමෙරිකාවට අයත් හවායි හා ගුවාම් යන දූපත්වලට ළඟාවීමට නොහැකි නමුත් දකුණු කොරියාවට හා ජපානයට ළඟාවීමට හැකියාව ඇති බව මාධ්‍ය වාර්තා සඳහන් කරයි.
ඇමෙරිකාවට පහරදෙන බවට උතුරු කොරියාව මෙසේ අනතුරු ඇඟවූයේ දකුණු කොරියාව හා ඇමෙරිකාව අතර පෙරේදා යුද කටයුතු සම්බන්ධයෙන් වූ ගිවිසුමකට අස්සන් තැබීමෙන් පසුවයි. දකුණු කොරියාව යුද්ධයකට මැදි වූවහොත් අතිරේක බලසේනා ලබාදීමට ඇමෙරිකාව එම ගිවිසුමෙන් සිය එකඟතාව පළ කළේය.