තමා ඇමෙරිකානු පුරවැසියකු නම් ලබන නොවැම්බර් හය වැනිදා පැවත්වෙන ඇමෙරිකානු ජනපතිවරණයේ දී ඡන්දය දෙන්නේ ජනපති ඔබාමාට යැයි වෙනිසියුලා නායක හියුගෝ චාවේස් පවසයි. ඇමෙරිකාව සහ ඇමෙරිකාවේ දේශපාලන ප‍්‍රතිපත්ති විවේචනය කරන චාවේස් මේ බව කියා සිටියේ සෑම සති අන්තයකම පවත්වන සිය දේශපාලන රූපවාහිනී වැඩසටහනට සහභාගී වූ අවස්ථාවේදීය. ඔබාමා, වෙනිසියුලාවේ කැරකස් නුවර වැඩකරන පංතියේ වැසියකු නම් ලබන 7 වැනිදා වෙනිසියුලාවේ පැවැත්වෙන ජනපතිවරණයේ දී ඔහු තමන්ට ඡන්දය දේවි යැයි ද වෙනිසියුලා නායකයා වැඩිදුරටත් කියා සිටියේය. ඊට හේතුව තමා සහ ඇමෙරිකා ජනාධිපති ඔබාමා ජනහිත හඳුනන ජනතා නායකයන් යැයි ද චාවේස් පැහැදිලි කළේය. වෙනිසියුලා ජනපතිවරණයට ඉදිරිපත් වන චාවේස්ට විපක්ෂ නායක හෙන්රීක් කැප්රිලේගෙන් අභියෝගයක් එල්ල වී ඇත. දේශපාලන ප‍්‍රතිපත්ති හේතුවෙන් සහ ජනපති ලෙස ගත් ඇතැම් තීරණ හේතුවෙන් ඔබාමාගේ ජනපි‍්‍රයත්වය ද මේ වනවිට පහළ වැටී ඇති අතර ප‍්‍රතිවාදී රිපබ්ලිකන් පක්ෂ නායක මිට් රොම්නිගෙන් ඔහුට ප‍්‍රබල අභියෝගයක් එල්ල වී තිබේ.