ශල්‍යකර්ම සිදුකරද්දී සියළුම තොරතුරු ඇතුලත් කළු පෙට්ටියක් නිර්මාණය කිරීමට පර්යේෂකයන් පිරිසක් සමත්ව සිටිති. සැත්කම සිදුකරද්දී වීඩියෝ කැමරාවක් මාර්ගයෙන් දර්ශන පටිගත කර පරිඝනක උපාංගයක් මගින් ඒවා සියල්ල විශ්ලේෂණය කරයි. ශල්‍ය වෛද්‍යවරයා විසින් සිදුකරන වැරදී ඒ මාර්ගයෙන් සොයාගත හැකිවන අතර එමගින් ක්ෂණික ප්‍රතිචාර වෛද්‍යවරයාට ලබාදීමට ද හැකියාව ඇති බව පැවසේ.

මෙය ශල්‍යකර්මයන්හි කළු පෙට්ටියක සිහිනයක් මල්ඵල ගැනීමකි. එමගින් පශ්චාත් ශල්‍යකර්ම ගැටළුද බොහෝසේ අඩු කර ගත හැකිවේ. එමෙන්ම ශල්‍ය වෛද්‍යවරුනට සැත්කම ගැන විමසා බැලිය හැකි අතර ඉදිරි සැත්කම් සඳහා පෙර සුදානමක් ලබා ගැනීමට ද මෙමගින් හැකියාවක් ඇතැයි පර්යේෂකයන්ගේ මතයයි.

මෙය නිෂ්පාදනය ආරම්භකැර ඇත්තේ කැනඩාවේ පර්යේෂකයන් පිරිසකි. එය ගුවන් යානයක කළු පෙට්ටිය හා සමාන බවත් ගුවන් යානයේ සියළු ම විස්තර හා තොරතුරු දැනුම් දෙන ආකාරයෙන් ම ශල්‍ය කර්මයේ සියළු තොරතුරු මෙහි අඩංගු වේ.

උපකරණය නිපදවන කන්ඩායමේ ප්‍රධානී ටොරන්ටෝහි ශාන්ත මයිකල් රෝහලේ ප්‍රධාන ශල්‍ය වෛද්‍ය ටියඩෝර් ග්‍රැන්චරෝ පවසන්නේ මේ කළු පෙට්ටිය භාවිතයට ගැනීමෙන් අනාගත ශල්‍යකර්මවල අතපසුවීම් වළක්වාගත හැකිවන බවයි.

රෝහල් රැසක් දැනටත් මේ උපකරණය ඇණවුම් කැර ඇතැයි ද පැවසේ. එසේ වුව ද වෛද්‍ය කණ්ඩායම් කිහිපයක් මේ උපකරණයෙන් නීතිමය ගැටළු මතුවිය හැකියැයි සිය විරෝධය පළකැර ඇත. ඔවුන්ගේ මතය වී ඇත්තේ මේ උපාංගය සවිකිරීමෙන් අපේක්ෂිත ප්‍රතිඵල ලබාගැනීමට වඩා සැත්කම පිළිබඳ අනවශ්‍ය තොරතුරු අනාවරණය වීම ගැටළුවක් විය හැකි බවයි. එසේ වුව ද මෙය අධ්‍යාපනික මෙවලමක් ලෙස යොදා ගැනීමේ හැකියාව ඇතැයි ද ඔවුහු කියති.