බංග්ලාදේශ ඇඟලූම් කම්හල් ගොඩනැගිල්ල කඩා වැටීමේ සිද්ධියට වගකිව යුතු පුද්ගලයන්ට මරණ දඬුවම දෙන්නැයි රජයට බලකරමින් එරට ඩකා අගනුවර ඊයේ (1) පැවැති මැයි දින රැලියට සහභාගී වූ ඇඟලූම් කම්හල් සේවක සේවිකාවෝ කලහකාරීව හැසිරුණහ.

ප‍්‍රචණ්ඩකාරීව හැසිරුණු පිරිස්..


පොලිසිය ඔවුන්ට හරස්වූ අවස්ථාවේ හටගත් ගැටුම්වලින් 150 දෙනෙක් තුවාල ලැබූහ. ඒ අතර පොලිස් නිලධාරීහු ද සිටිති. දස දහසකට වැඩි පිරිසක් එම මැයි දින රැලියට එක් ව සිටි අතර කලහකාරීව හැසිරුණු පිරිස් ඩකා අගනුවර රජයේ කාර්යාලවලටත් බස් රථවලටත් පහර දීමට පටන් ගෙන ඇත.

මැයි දින රැලිය සංවිධානය කළේ බංග්ලාදේශ ඇඟලූම් කම්හල් සේවක සංගමයයි. එහි නායකයකු වන කමුරුල් අන්නාම් කියා සිටියේ ඇඟලූම් කම්හල් සේවක සේවිකාවන්ගේ ආරක්ෂාව ගැන රජය කිසිදු සැළකිල්ලක් නොදක්වන බවය.

ඩකා අගනුවර මහල් අටකින් සමන්විත ‘රනා ප්ලාසා’ ගොඩනැගිල්ල බිමට සමතලා වූයේ ඉකුත් 24 වැනිදා ය. ගොඩනැගිල්ලේ හිමිකරු සොහෙල් රානා පමණක් නොව, ප‍්‍රමිතියෙන් තොරව ගොඩනැගිල්ල ඉදිකිරීමට අනුමැතිය දුන් රජයේ ඉන්ජිනේරුවන් දෙදෙනා ද රටින් පලා යෑමට උත්සහ කළ නමුත් ඔවුහු පොලිස් අත්අඩංගුවට පත් වූහ.

රානාගේ බිරිඳ මෙන්ම රානාගෙන් අල්ලස් ගත් නගරසභා බලධාරීහු ද පොලිස් අත්අඩංගුවේ සිටිති. බංග්ලාදේශ මහාධිකරණය ඔවුන්ගේ බැංකු ගිනුම් ද අත්හිටිවීමට තීරණය කර ඇත.

කඩා වැටෙද්දී ගොඩනැගිල්ලේ, ඇඟලූම් කම්හල්වල සේවක සේවිකාවෝ 3,122 ක් සේවයේ නියැළී සිටියහ. තවත් දහසක් පමණ දෙනා එහි පිහිටි සෙසු වෙළෙඳසැල්වල සේවය කළහ. ගොඩනැගිල්ල කඩා වැටීමෙන් පසු 2,500 දෙනකු දිවි බේරා ගත් අතර 400 දෙනෙක් ජීවිතක්ෂයට පත්වූහ. 147 දෙනකු තවමත් අතුරුදන්ව ඇතැයි ද පැවැසෙයි.