ලොව ප්‍රකට බ්‍රිතාන්‍ය ජාතික සත්ව චර්යා විද්‍යාඥවරියක වන ජේන් ගුඩාල් අභාවප්‍රාප්ත විය. 

ජේන් ගුඩාල් ලොව පුරා ප්‍රසිද්ධියට පත් වූයේ ප්‍රිමේටාවන් එනම් මනුෂ්‍ය අපගේ සමීපතම ඥාතීන් ලෙස සැලකෙන චිම්පන්සීන් සම්බන්ධයෙන් ලොවට අනාවරණය කළ අධ්‍යයනයන් නිසාය.

මියයනවිට ඇගේ වයස අවුරුදු 91 කි.

ජේන් ගුඩාල් පදනම නිවේදනයක් නිකුත් කරමින් පවසා ඇත්තේ ඇමෙරිකාවේ කැලිෆෝනියා ජනපදයේ දේශන මාලාවකට ගොස් සිටින ගුඩාල්, නින්දේදීම අවසන් සුසුම් හෙලූ බවය.

සත්ව චර්යා විද්‍යාඥවරියක යනු සතුන්ගේ ස්වභාවික පරිසරය තුළ සතුන්ගේ චර්යාවන් පිළිබඳව විද්‍යාත්මකව අධ්‍යයනය කරන තැනැත්තෙකි.

ආචාර්ය ගුඩාල්, සත්ව චර්යා විද්‍යාඥවරියක ලෙස කළ සොයාගැනීම්, සතුන් ගැන (විශේෂයෙන් චිම්පන්සීන් ගැන) කරුණු කාරණා රැසක් අනාවරණය කර දීමට සමත් වුණු බව කාගේත් පිළිගැනීමය. මිනිසුන් සහ චිම්පන්සීන් අතර ඇති සබඳතා පිළිබඳව පැවති මතවාද වෙනස් කිරීමටත්, සත්ව විද්‍යාව පිළිබඳ ක්ෂේත්‍රයේ නව මානයන් විවර කිරීමටත් ගුඩාල්ට හැකිවිය.

ගුඩාල් උපන්නේ 1934 ලන්ඩන් නුවරදීය. ඇය චිම්පන්සීන් ගැන අධ්‍යයන කටයුතු ආරම්භ කළේ 1960 වසරේ දී ටැන්සානියාවෙනි. චිම්පන්සීන්, ගෝරිල්ලන් ආදී මහා වානරයන් ආරක්ෂා කිරීම වෙනුවෙන් ගුඩාල්, ජේන් ගුඩාල් පදනම පිහිටුවූයේ 1977 දීය.

2002 දී ඇය එක්සත් ජාතීන්ගේ සංවිධානයේ සාම දූතවරියක ලෙස කටයුතු කළාය. ඇගේ අභාවය සම්බන්ධයෙන් එක්සත් ජාතීන්ගේ සංවිධානය ද සොව පළ කර ඇත.