කෘෂිකර්ම අමාත්‍යාංශය සඳහා කුලියට ලබාගෙන ඇති ගොඩනැගිල්ල මෙතෙක් පාවිච්චියට ගෙන නැතත් පසුගිය මාස 11 ක කාලයක් තුළ රුපියල් කෝටි  27 ක මුදලක් ගෙවා ඇත.

 මේ තරම් විශාල කුලියක් රජයේ අමාත්‍යාංශයක් සඳහා ගෙවනු ලබන ප්‍රථම අවස්ථාව මෙය වෙයි. 

සරත් ෆොන්සේකා මහතා ඇමැති ධුරය දරන ප්‍රාදේශීය සංවර්ධන අමාත්‍යාංශය පවතින ගොනැගිල්ල සඳහා මාසිකව ලක්ෂ 110 ක මුදලක් ගෙවනු ලබන අතර සෞඛ්‍ය අමාත්‍යාංශය පවත්වාගෙන යන ගොඩනැගිල්ලට ලක්ෂ 100 කට ආසන්න කුලියක් ගෙවනු ලබන බව සඳහන් වේ.

 කෘෂිකර්ම අමාත්‍යාංශය සඳහා ඉහළම කුලියක් ගෙවීම පිළිබඳව පාර්ලිමේන්තු මන්ත්‍රී නලින්ද ජයතිස්ස මහතා පාර්ලිමේන්තුවේදී ප්‍රශ්න කර තිබිණි.

 යහපාලනය යටතේ රජය මේ තරම් අතිවිශාල මුදලක් වැය කිරීම බරපතළ විවේචනයකට හේතු වී ඇත. කෝට්ටේ, රාජගිරිය ශ්‍රී ජයවර්ධනපුර මාර්ගයේ අංක 288 දරන ස්ථානයේ මහල් 10 කින් සමන්විත මෙම ගොඩනැගිල්ල සඳහා මාසික කුලිය රුපියල් ලක්ෂ 245 කි.

සිනමා නිළි සබීතා පෙරේරා මහත්මියගේ සැමියා වන උපාලි ජයසිංහ මහතාට අයත් මෙම ගොඩනැගිල්ල  වර්ග අඩි ලක්ෂයක පමණ ප්‍රමාණයකින් යුක්ත වන අතර විශාල ප්‍රමාණයේ රථ ගාලක්ද පවතී. මෙම රථගාලෙහි වාහන 100 කට වැඩි ප්‍රමාණයක් එකවර ගාල්කර තැබිය හැකි බව ද වාර්තා වේ.

 අමාත්‍යංශ සඳහා අධීක්ෂණ කමිටු පත් කිරීමේදී පාර්ලිමේන්තු ගොඩනැගිල්ලේ ඉඩකඩ ප්‍රමාණවත් නොවන නිසා ඒ ආසන්නයේ ගොඩනැගිලි ඒ සඳහා යොදා ගැනීමට යෝජනා වී තිබිණි. ඒ අනුව පාර්ලිමේන්තු බලධාරින් විසින් කරන ලද සොයා බැලීමකට අනුව කෘෂිකර්ම අමාත්‍යාංශය           පවතින ගොඩනැගිල්ල ඒ සඳහා යොදා ගැනීමට තීරණය වී ඇත. එම තීරණය අනුව කෘෂිකර්ම අමාත්‍යාංශය සඳහා විකල්ප ගොඩනැගිල්ලක් වශයෙන් මෙම ජයසිංහ ගොඩනැගිල්ල තෝරාගෙන ඇත.

 තවත් විශේෂත්වයක් නම් මෙම ගොඩනැගිල්ලට අත්තිකාරම් වශයෙන් ලක්ෂ 5700 ක මුදලක් ගෙවා තිබීමයි. රජයේ ජ්‍යෙෂ්ඨ දේශපාලනඥයකුගේ අවශ්‍යතාව මත මෙම ගොඩනැගිල්ල කුලියට ගෙන ඇති බව දැනගන්නට ඇත.

 අධීක්ෂණ කමිටු පාර්ලිමේන්තු ගොඩනැගිල්ලෙන් පිටත පැවැත්වීමට තීරණය කර තිබුණත් තවමත් එම කමිටු රැස්වීම් පැවැත්වෙන්නේ පාර්ලිමේන්තු ගොඩනැගිල්ලේමය.

 මාස 11 ක් තිස්සේ මෙම ගොඩනැගිල්ල අමාත්‍යංශයට සුදුසු පරිදි ඉදිකිරීම් කටයුතු අවසන් කර නොමැති බවද පැවසේ.

දයාසීලි ලියනගේ

සේරම කියනකම් ඉන්න

 මෙම ගොඩනැගිල්ල කුලියට ගැනීම සම්බන්ධයෙන් ඇමැති දුමින්ද දිසානායක මහතාගෙන් විමසුවෙමි.
කෘෂිකර්ම අමාත්‍යාංශයට ලබා ගෙන ඇති ගොඩනැගිල්ල සම්බන්ධයෙන් ඉදිරිපත් කර තිබෙන සියලු චෝදනාවලට ඉදිරි දින කීපය තුළදී එකවර පිළිතුරු ලබා දෙන බව කී ඇමැති දුමින්ද දිසානායක මහතා මෙසේද ප්‍රකාශ කළේය.
මෙම ගොඩනැගිල්ල සම්බන්ධ සියලු තොරතුරු එකවර කියන්නම්.

 ප්‍රශ්නය:- චෝදනා එක එල්ලේම තියෙන්නේ ඔබට?
පිළිතුර:- චෝදනා වලට නම් කමක් නැහැ. චෝදනා එල්ල කරන එක ලේසියි.

ප්‍රශ්නය:- ඔබේ පැත්තෙන් පිළිතුරු නොදෙන්නේ ඇයි
 පිළිතුර:- සම්පූර්ණ තොරතුරු එළියට දානවා. එතෙක් ඉන්න.

 ප්‍රශ්නය:- ඇයි දැන් කියන්නෙ නැත්තෙ.
  පිළිතුර:- කරුණු ටික ටික කියල වැඩක් නැහැ. සියලු දේවල් කියනවා.

 ප්‍රශ්නය:- මේ ගොඩනැගිල්ල කුලියට ගැනීමට ඔබ සම්බන්ධ නැද්ද?
 පිළිතුර:- කොහොමද සිදුවුණේ කියල කියන්නම්.

 ප්‍රශ්නය:- මේ ගොඩනැගිල්ලෙ පදිංචියට යන්නේ කවදද?
 පිළිතුර:- වැඩ ඉවර කරල බාර දීපු ගමන් යනවා.

 ප්‍රශ්නය:- මාස 11 ක් කුලී ගෙව ගෙවා ඉදල තියෙනවා.
 පිළිතුර:- ඔක්කොටම පිළිතුරු දෙන්නම්කො.
 (දුරකථනය ක්‍රියා විරහිත කෙරුණි.)