සුජිත් හේවාජුලිගේ

නව ජනාධිපතිවරයා පාර්ලිමේන්තුව විසුරුවා හැරියහොත් මහ මැතිවරණය කඩිනමින් පැවැත්වීමට සූදානමින් සිටින්නැයි මැතිවරණ කොමිෂන් සභාව සියලු‍ම දිස්ත්‍රික් තේරීම් භාර නිලධාරීන්ට දැනුම් දී ඇත.

ඒ සඳහා කඩිනමින් මුදල් සොයා ගැනීම කෙරෙහිද කොමිෂන් සභාවේ විශේෂ අවධානය යොමුවී ඇත. නව ජනාධිපතිවරයා පත්වීමෙන් පසු පාර්ලිමේන්තුව විසුරුවා හැරීමේ වැඩි ඉඩකඩක් පවතින බව දේශපාලන විචාරකයෝ පෙන්වා දෙති.

ජනාධිපතිවරණයෙන් පසු පාර්ලිමේන්තුව විසුරුවා හැරීම සම්බන්ධයෙන් ඒ ඒ දේශපාලන පක්ෂ ද පසුගිය දිනවල වෙන වෙනම සාකච්ඡා පවත්වා ඇතැයි දැන ගන්නට ඇත.

මේ අතර ඉදිරි වසර දෙකේ දී මැතිවරණ කොමිෂන් තවත් මැතිවරණ හතරකට සූදානම් වෙයි. මහ මැතිවරණය, ඇල්පිටිය ප්‍රාදේශීය සභා මැතිවරණය, පළාත් පාලන මැතිවරණය සහ  පළාත් සභා මැතිවරණය එම මැතිවරණ හතරයි.

පළාත් පාලන මැතිවරණයේ නාමයෝජනා අහෝසි කරන්නැයි දේශපාලන පක්ෂ ඇතුළු පාර්ශ්ව ගණනාවක් දැනටමත් ඉල්ලීම් කර ඇත. මැතිවරණ කොමිෂන්  සභාව ඒ සම්බන්ධයෙන් නීති අංශ සමඟ සාකච්ඡා කරමින් සිටින බව දැනගන්නට ඇත.

නාම යෝජනා අහෝසි කරන්නේ නම් පාර්ලිමේන්තුවෙන් නොපමාව යෝජනාවක් සම්මත කරගත යුතු බව මැතිවරණ කොමිෂන් සභාවේ සහ නීති විශාරදයන්ගේ මතයයි.