උපුල් වික්‍රමසිංහ

හදිසි අවශ්‍යතාවක් සඳහා මුදල් අවශ්‍ය බව දන්වමින් තමන් හඳුනන අයගෙන් ලැබෙන වට්ස්අප් පණිවුඩවලට ප්‍රතිචාර දැක්වීමට පෙර සාමාන්‍ය දුරකථන ඇමතුමක් ලබා දී පණිවුඩය එවූවේ අදාළ පුද්ගලයාම ද යන්න තහවුරු කර ගැනීම අතිශය වැදගත් බව ශ්‍රී ලංකා පරිගණක හදිසි ප්‍රතිචාර සංසදයේ ජ්‍යෙෂ්ඨ තොරතුරු ආරක්ෂණ නිලධාරී චාරුක දමුණුපොළ පවසයි.

වට්ස්අප් පණිවුඩ ඔස්සේ මුදල් වංචා කිරීම් සම්බන්ධ පැමිණිලි මේ වනවිට 34 ක් ලැබී ඇති බවත් එම වංචාවලට හසුවූ ඇතැම් අය රුපියල් පනස් දහස, ලක්ෂය බැගින් මුදල් බැර කර ඇති බවත් කී ඔහු වංචාකරුවන් වට්ස්අප් ගිණුම් හැක් කර මේ ආකාරයේ පණිවුඩ යවමින් මුදල් වංචා කරන බවත් සඳහන් කළේය.

සමූහ ඇමතුමක (Conference Call) ට හෝ සූම් සාකච්ඡාවකට හෝ සම්බන්ධ වන ලෙස දන්වමින් වට්ස්අප් ඇමතුම් ලැයිස්තුවේ (Contact List) සිටින කෙනෙකුගේ නමින් (එම පුද්ගලයාගේ ගිණුමද හැක් කර ඇති අවස්ථාවක) ඇමතුමක් ලබා දීමත් ඊට සම්බන්ධ වූ පසු ලැබෙන කේත අංකය (Code) ඉල්ලා සිටීමත් එය ලබා දුන් පසු වට්ස්අප් ගිණුම හැක් කිරීමත් මේ වංචාවේදී සුලභව සිදු වන බව ද හෙතෙම පෙන්වා දුන්නේය. 

එසේ ගිණුම හැක් කළ පසු වට්ස්අප් ඇමතුම් ලැයිස්තුවේ සිටින සියලු දෙනාට හදිසි අවශ්‍යතාවකට යැයි පවසමින් (ගිණුමේ හිමිකරු සේ පෙනී සිටිමින්) මුදල් ඉල්ලා පණිවුඩ යැවීම මෙහිදී සිදු වන බව ද ඔහු කීවේය. කිසි විටෙකත් අන් අයට කේත අංක ලබා දීමෙන් වළකින ලෙස ද හෙතෙම මහජනතාවට උපදෙස් දෙයි.