මහින්ද නිශ්ශංක
මෙවර ජනාධිපතිවරණයේ තැපැල් ඡන්ද සලකුණු කිරීමට ලබා දී තිබූ 4, 5, හා 6 තෙදිනෙහි අවස්ථාව නොලද තැපැල් ඡන්ද දායකයන්ට ලබන 11, 12 යන දින දෙකේ සිය ඡන්දය සලකුණු කිරීමේ අවස්ථාව ලබා දී ඇතැයි මැතිවරණ කොමිෂන් සභාව සඳහන් කරයි.
ඒ අනුව නියම කර තිබූ දිනවල තැපැල් ඡන්දය ප්‍රකාශ කිරීමට නොහැකි වූ ඡන්ද දායකයන්ට තම සේවා ස්ථානය පිහිටි දිස්ත්‍රික්කයේ දිස්ත්‍රික් ලේකම් කාර්යාලයේදී තැපැල් ඡන්දය සලකුණු කිරීමට හැකි බව කොමිෂන් සභාව වැඩි දුරටත් පැවසීය. ජනාධිපතිවරණයේ තැපැල් ඡන්ද සලකුණු කිරීමට නියම කර තිබූ දිනවල මෙන් ලබන 11, 12 යන දින දෙකේද ඡන්ද සලකුණු කිරීම නිරීක්ෂකයන් විසින් නිරීක්ෂණය කරනු ලබන බවද ෆැපරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා පැවසීය.
ජනාධිපතිවරණයේ තැපැල් ඡන්ද ප්‍රකාශ කිරීම සඳහා තැපැල් ඡන්ද දායකයන් 712319 දෙනෙකු මෙවර සුදුසුකම් ලබා සිටි බව ද මැතිවරණ කොමිෂන් සභාව සඳහන් කරයි.