(රොමේෂ් මධුෂංඛ)

යාපනය මාණිප්පායි ප්‍රදේශයේදී ටිපර් රථයකින් ප්‍රවාහනය කරමින් තිබූ රුපියල් කෝටියකට ආසන්න වටිනාකමකින් යුත් කේරළ ගංජා කිලෝ 90 ක් අද (12)  අත්අඩංගුවට ගත් බව යාපනය පොලිස් විශේෂ කාර්ය බලකාය පවසයි.

පොලිස් විශේෂ කාර්ය බලකා නිලධාරීන් මාණිප්පායි ප්‍රදේශයේ කරන ලද විශේෂ සෝදිසි මෙහෙයුමකදී අදාල ටිපර් රථය පැමිණ ඇති අතර එහිදී පොලිස් විශේෂ කාර්ය බලකා නිලධාරීන් දැක ටිපර් රථය දමා රියදුරු පලා ගොස් ඇත.

එහිදී ටිපර් රථය පරීක්ෂා කළ පොලිස් විශේෂ කාර්ය බලකා නිලධාරීන්ට ටිපර් රථයේ සඟවා තිබූ කේරල ගංජා කිලෝ 90 ක් හමු වූ බව යාපනය පොලිස් විශේෂ කාර්ය බලකා කඳවුරේ නිලධාරියෙක් පැවසීය.

අත්අඩංගුවට ගත් කේරල ගංජා තොගය හා ටිපර් රථය පොලිස් විශේෂ කාර්ය බලකා නිලධාරීන් වැඩිදුර පරික්ෂණ කටයුතු සඳහා මාණිප්පායි පොලිසියට භාර දී ඇත.

ටිපර් රථයේ රියදුරු අත්අඩංගුවට ගැනීමට පරික්ෂණ ආරම්භ කර ඇති බවද මාණිප්පායි පොලිසිය පැවසීය.