(  තිළිණි ද සිල්වා )
දැනට ශ්‍රී ලංකාවේ පෞද්ගලික සංචාරයක නිරතව සිටින එක්සත් ජාතීන්ගේ සහකාර මහලේකම්වරිය හා එක්සත් ජාතීන්ගේ සංවර්ධන වැඩසටහනේ ආසියා පැසිෆික් කලාපීය කාර්යාංශයේ අධ්‍යක්ෂවරිය වන කන්නි විග්නරාජා මහත්මිය  සහ විදේශ සබඳතා අමාත්‍ය දිනේෂ් ගුණවර්ධන මහතා අතර හමුවක් පවත්වා ඇත.
 

 නිදහස් හා සාධාරණ මැතිවරණයකින් අනතුරුව තේරී පත් වූ ජනාධිපති ගෝඨාභය රාජපක්ෂ මහතා වෙත  මහලේකම් විග්නරාජා මහත්මිය සිය සුබ පැතුම් එක් කල අතරම සාර්ථක  ධූර කාලයක් සඳහා අමාත්‍ය ගුණවර්ධන මහතාට සහ නව රජයට ද ඇයගේ සුබ පැතුම් පිරිනැමුවාය. 
 
 නව රජය විසින් ආර්ථික සංවර්ධන මෙහෙයුම ඉදිරියට ගෙන යාම කාලෝචිත වන බව ඇය මෙම හමුවෙදී පැවසුවාය. 
 
 ශ්‍රී ලංකාව ඉහළ සංවර්ධන කාණ්ඩයෙහි ලැයිස්තුගත කර ඇති මේ වසරේ එක්සත් ජාතීන්ගේ මානව සංවර්ධන වාර්තාවෙන් මනාව පිළිබිඹු වන පරිදි, කැලඹිලි සහිත කාල පරිච්ඡේදයන්ට ඔරොත්තු දීම සඳහා මෙරටට ඇති හැකියාව ඇය පැසසුමට ලක් කළාය.
 
 
මේ වන විට එක්සත් ජාතීන්ගේ සංවිධානය තුළ ශ්‍රී ලාංකික සම්භවයක් ඇති ඉහළම නිලධරයා බවට පත්ව සිටින සහකාර මහලේකම් විග්නරාජා මහත්මිය, සිය උසස් තනතුරට පත්වීම පිළිබඳව සුබ පැතුම් එක් කරමින් අමාත්‍ය ගුණවර්ධන මැතිතුමා කියා සිටියේ රජය එක්සත් ජාතීන්ගේ සංවර්ධන වැඩසටහන සමඟ සහයෝගයෙන් කටයුතු කිරීමේ දී සංවර්ධනය ප්‍රමුඛ විය යුතු බවයි. 
තිරසර සංවර්ධන න්‍යාය පත්‍රය සහ තිරසර සංවර්ධන ඉලක්ක ජාතික අයවැයේ හා සැලසුම්කරණයේ හරය වනු ඇති බව ඔහු අවධාරණය කළේය. 
 තොරතුරු හා සන්නිවේදන තාක්ෂණ ක්ෂේත්‍රයේ සංවර්ධනය, ජාතික දත්ත ගබඩා කිරීම සඳහා ඩිජිටල් වේදිකාවක් නිර්මාණය කිරීම සහ රාජ්‍ය අංශයේ කළමනාකරණ පද්ධති ශක්තිමත් කිරීම සඳහා එක්සත් ජාතීන්ගේ සංවර්ධන වැඩසටහන මඟින් ලබා දෙන සහාය එතුමා තවදුරටත් පැසසුමට ලක් කළේය.

 ආසියා පැසිෆික් කලාපීය කාර්යාංශයේ අධ්‍යක්ෂවරිය වන කන්නි විග්නරාජා මහත්මිය එක්සත් ජාතීන්ගේ සංවිධානයේ ජ්‍යෙෂ්ඨ නිලධාරිනියක වන අතර ඉකුත් නොවැම්බර් මාසයේදී එක්සත් ජාතීන්ගේ මහලේකම්වරයා විසින් මෙම පත්වීම සිදු කළේය.එසේම ඇය උපතින් ශ්‍රී ලාංකිකයෙකි. 
 
 විදේශ සබඳතා ලේකම් රවිනාථ ආර්යසිංහ මහතා සහ නිව්යෝර්ක් හි සිටින එක්සත් ජාතීන්ගේ ශ්‍රී ලංකා නිත්‍ය නියෝජිත ක්ෂෙනුකා සෙනෙවිරත්න මහත්මිය ද මෙම රැස්වීමට සහභාගී වූහ.