(විමුක්ති එස් රුද්‍රිගු)

බංග්ලාදේශ හිටපු අග්‍රාමාත්‍ය ෂෙයික් හසීනා ධුරයෙන් පැන්නූ අරගලයට ගෞරව දැක්වීම සඳහා ඇය ජීවත්වූ සුඛෝපභෝගී නිල නිවස අරගලයේ මතකයන් තැන්පත් කළ කෞතුකාගාරයක් බවට පත්කරන බව බංග්ලාදේශ අන්තර්වාර රජයේ ප්‍රධානී මුහම්මද් යුනුස් පසුගියදා ප්‍රකාශ කළේය.

යෝජිත කෞතුකාගාරය ෂෙයික් හසීනාගේ පාලනයේ දුර්වලතා සහ ඇයට අග්‍රාමාත්‍ය ධුරය අත්හැර දැමීමට සිදුවූ බංග්ලාදේශ ජාතිකයන්ගේ කේන්තිය පිළිබඳ මතකයන් ආරක්ෂා කර තබනු ඇතැයි මුහම්මද් යුනුස් හසීනා ජීවත්වූ සුඛෝපභෝගී නිල නිවසේ සංචාරය කරමින් පැවැසුවේය.

රජයේ රැකියා කෝටාවට විරුද්ධව බංග්ලාදේශ විශ්ව විද්‍යාල සිසුන් පෙරමුණ ගෙන ආරම්භ කළ විරෝධතා හේතුවෙන් ෂෙයික් හසීනා අග්‍රාමාත්‍ය ධුරයෙන් ඉල්ලා අස්වී පසුගියදා අගෝස්තු 5 වැනිදා හෙලිකොප්ටරයෙන් ඉන්දියාවට පළා ගියේය. හසීනාගේ රජය ඉවත් වීමෙන් පසුව පත්වූ අන්තර්වාර රජයේ ප්‍රධානියා ලෙස 84 හැවිරිදි මුහම්මද් යුනුස් තෝරා පත්කර ගැනිණි.

මේ වනවිට අත් අඩංගුවට ගැනීම සඳහා බංග්ලාදේශ අධිකරණය ෂෙයික් හසීනාට විරුද්ධව වරෙන්තු නිකුත් කර ඇති අතර ඇයගේ වසර 15 ක පාලන කාලය තුළ විවිධ දූෂණ හා අක්‍රමිකතා සිදුවූ බවට චෝදනා එල්ල වෙමින් පවතී. හසීනාට ධුරයෙන් ඉවත්වීමට සිදුවූ විරෝධතාවලදී බංග්ලාදේශ ජාතිකයෝ 700 කට ආසන්න පිරිසක් මිය ගියහ.