(සුජිත් හේවාජුලිගේ )

රටපුරා අනිද්දා පැවැත්වීමට නියමිත හර්තාලයට කිසිදු සහයක්  ලබා නොදෙන බවත් එම කාලයේදී අත්‍යවශ්‍ය සේවා අඛණ්ඩව පවත්වාගෙන යෑමට සියලු පියවර ගන්නා බවත්  අත්‍යවශ්‍ය සේවා සපයන ආයතන රැසක වෘත්තී සමිති නියෝජිතයෝ ජනාධිපති ගෝඨාභය රාජපක්ෂ මහතාට අද (3) පොරොන්දුවූහ.

පටු දේශපාලන වුවමනා මත මේ වැඩ වර්ජනය පවත්වන්නේ ජනතාව අපහසුතාවයට පත් කිරීමේ අරමුණින් බවද  එම නියෝජිතයෝ සඳහන් කළහ.

නියෝජිත පිරිස මෙසේ පැවසුවේ ජනාධිපති ගෝඨාභය රාජපක්ෂ මහතා සමඟ කොළඹ කොටුවේ ජනාධිපති  මන්දිරයේදී  අද (3)  පස්වරුවේ පැවති සාකච්ඡාවකදීය.

එම වැඩ වර්ජනය සේවක අයිතීන් වෙනුවෙන් නොව දේශපාලන පක්ෂ කිහිපයක වුවමනාවක් මත සිදු කෙරෙන්නක් බවද   වෘත්තීය සමිති නියෝජිතයෝ පෙන්වා දුන්හ.

ආර්ථික අර්බුදය තවදුරටත් උග්‍ර  හැරවීම සහ මහජනතාව පීඩාවට පත් කිරීම මෙම වැඩවර්ජනයේ  ප්‍රධාන අපේක්ෂාව බවත්  ඒ තත්වය තේරුම්ගෙන ජන ජීවිතය සාමාන්‍ය පරිදි පවත්වාගෙන යෑමට කටයුතු කිරීම සියලු සේවකයන්ගේ යුතුකම සහ වගකීම බවත්  ඔවුහු පැවසූහ .

ආර්ථික අර්බුදයෙන්  ගොඩඒම සඳහා  නව  ක්‍රමවේදයන්ට යොමුවීමේ සහ දේශපාලන භේදවලින් ඉවත්වීමේ අවශ්‍යතාව ජනාධිපතිවරයා මෙහිදී පෙන්වා දුන්නේය .

ආර්ථික  අර්බුදය තවදුරටත් උග්‍ර අතට හැරවීම  වැඩ වර්ජනය පිටුපස ඇති දේශපාලන අරමුණ බවත් එය වටහාගෙන ආයතන බිද වැටීමට ඉඩ නොතැබිය යුතු බවත් ජනාධිපතිවරයා කීවේය.

රටපුරා පසුගිය 28 වැනිදා පැවති  වැඩවර්ජනය නොතකා රාජකාරි ඉටුකළ සේවකයන්ට  ස්තූතිය පුද කළ ජනාධිපතිවරයා  පවතින තත්වය වටහා ගෙන  ජන  ජීවිතය සාමාන්‍ය පරිදි පවත්වාගෙන යෑමට අවශ්‍ය සහාය ලබා දෙන ලෙස සියලු වෘත්තීය සමිතිවලින් ඉල්ලීමක් කළේය.

මේ අවස්ථාවට අමාත්‍යවරුන්වන දිලුම් අමුණුගම, මොහාන්  ද සිල්වා කාංචන විජේසේකර, ප්‍රමිත බණ්ඩාර තෙන්නකෝන්, පාර්ලිමේන්තු මන්ත්‍රී ගාමිණී ලොකුගේ, ජනාධිපති ලේකම් ගාමිණී සෙනරත් යන මහත්වරුන්ද ප්‍රවාහන, විදුලිබල, වරාය හා නාවික බලශක්ති අමාත්‍යාංශවල  ලේකම්වරුන් හා  ආයතන ප්‍රධානීහු ඇතුළු පිරිසක්ද සහභාගි වූහ.