හිටපු ජනපතිවරුන්ගේ ආරක්ෂාව ගැන වැඩ බලන පොලිස්පතිගෙන් වාර්තාවක්

(සුජිත් හේවාජුලිගේ)

හිටපු ජනාධිපතිවරුන්ගේ ආරක්ෂාව සම්බන්ධයෙන් තක්සේරු වාර්තාවක් අමාත්‍ය මණ්ඩලයට ඉදිරිපත් කිරීමට වැඩ බලන පොලිස්පති ප්‍රියන්ත වීරසුරිය මහතා තීරණය කර ඇත.

ඒ අනුව එම වාර්තාව පදනම් කරගෙන කැබිනට් මණ්ඩලය දෙන තීරණයෙන් පසු හිටපු ජනාධිපතිවරුන්ගේ ආරක්ෂාව අඩු කරනවාද නැද්ද යන්න සම්බන්ධයෙන් තීරණයක් ගන්නා බව වැඩ බලන පොලිස්පති ප්‍රියන්ත වීරසූරිය මහතා පැවසීය.

හිටපු ජනාධිපතිවරුන්ගේ ආරක්ෂාව සම්බන්ධයෙන් සොයා බැලීමට පත් කෙරුණු කමිටුවේ නිර්දේශ මත පදනම්ව එම තක්සේරු වාර්තාව සකස් කිරීමට නියමිතය.

වාර්තාව ආරක්ෂක අමාත්‍යාංශය මාර්ගයෙන් කැබිනට් මණ්ඩලයට  ඉදිරිපත් කිරීමට  පොලිස්පතිවරයා බලාපොරොත්තු වෙයි.

හිටපු ජනාධිපතිවරුන්ගේ ආරක්ෂාව  ඇතුළු පහසුකම් සම්බන්ධයෙන්  කරුණු සමාලෝචනය කිරීම සඳහා ජනාධිපති අනුර කුමාර දිසානායක මහතා විසින් ත්‍රිපුද්ගල කමිටුවක් පසුගියදා
පත් කෙරිණ.

එම කමිටුවේ වාර්තාවද නුදුරේදීම ජනාධිපතිවරයාට භාරදීමට නියමිතය.