(විමුක්ති එස් රුද්‍රිගු)

ශ්‍රී ලංකාවේ සිට පැමිණ එක්සත් රාජධානියේ සරණාගතභාවය ලබා ගත් එලංගෝ එලවලකන් මහතා ඉප්ස්විච් නගරයේ නගරාධිපති තනතුරට පත්වූවේය .ඉප්ස්විච් නගර සභා වාර්ෂික රැස්වීමේදී පැවැති ඡන්දයේදී ඒකමතිකව එලංගෝ එලවලකන් මහතා නගරාධිපති ලෙස තෝරා පත්කරගෙන ඇත.

එලවලකන් මහතා කම්කරු පක්ෂය නියෝජනය කරනු ලබයි. ඉප්ස්විච් නගර සභාවේ ප්‍රධානී නීල් මැක්ඩොනල්ඩ් මහතා විසින් නගරාධිපති ධුරය සඳහා එලංගෝ එලවලකන් මහතාගේ නම යෝජනා කරනු ලැබුවේය.නම යෝජනා කරමින් ඔහු පවසා සිටියේ බ්‍රිතාන්‍ය මහ මැතිවරණයේ ඡන්ද ප්‍රතිඵල ප්‍රකාශයට පත් කිරීමටද  නව නගරාධිපතිවරයා සිය ධුර කාලයේදී වාසනාවන්ත වනු ඇති බවය.

තමන් අද දිනයේ ඉතාමත් සතුටු වන බවත් ඉප්ස්විච් නගරයේ නගරාධිපතිවීමට හැකිවීම පිළිබඳව තමන් ආඩම්බරයට පත්වන බවත් තනතුර බාර ගැනීමෙන් පසුව  එලංගෝ එලවලකන් මහතා ප්‍රකාශ කළේය.ඉප්ස්විච් නගරාධිපති ලෙස පත්වූ ප්‍රථම හින්දු ජාතිකයාද එලවලකන් මහතාවේ.යුද්ධයෙන් පැන ආ සරණාගතයෙක් නගරාධිපති ධුරය සඳහා පත්වීම ලොවටම පණිවුඩයක් ලබා දෙනු ඇතැයි එලවලකන් මහතා චාරිත්‍රානුකූලව නගරාධිපති ධුරය සඳහා පත් කරමින් නගර සැරයන් ඇන්ඩෲ බීල් මහතා ප්‍රකාශ කළේය.

ශ්‍රී ලංකාව අතරහැර එක්සත් රාජධානියට පැමිණීමට ප්‍රථම එලංගෝ එලවලකන් මහතා ඉන්දියාවේ , උගන්ඩාවේ සහ රුවන්ඩාවේ සේවය කර ඇත.ඔහු 2006 වසරේදී ඉප්ස්විච් නගරයේ පදිංචියට පැමිණ තිබිණි.