(සුජිත් හේවාජුලිගේ)

වකුගඩු රෝග, පාලනය කළ නොහැකි දියවැඩියාව, දැඩි විජලනය වැනි රෝගවලින් පෙලෙන රෝගීන්ගේ සංකූලතා පාලනය කිරීමට භාවිත කරන සෝඩියම් බයි කාබනේට් එන්නත් හිඟයක් බව සෞඛ්‍ය අමාත්‍යාංශ ආරංචි මාර්ග අනාවරණය කළේය.

මෙම එන්නත් හිඟය හේතුවෙන් දැඩි සත්කාරවල ප්‍රතිකාර ලබන රෝගීන් සහ අවයව සැත්කම් සිදුකළ රෝගීන්ට ප්‍රතිකාර කිරීමේදී වෛද්‍යවරුන් දැඩි අසීරුතාවයට පත්ව සිටින බව වාර්තාවේ.

සෝඩියම් බයි කාබනේට් එන්නත හිඟවීමට බලපෑ ප්‍රධාන හේතුව වී තිබෙන්නේ එය දේශීයව නිපදවීම සඳහා එක්තරා සමාගමක් ජාතික ඖෂධ නියාමන අධිකාරියෙන් අවසර ඉල්ලා යොමුකළ අයැදුම්පතට අවසර ලබාදීමට වසර දෙකක කාලයක් ගතවීම බව එම ආරංචි මාර්ග සඳහන් කළේය.

එම සමාගමට මෙතෙක් වෛද්‍ය සැපයුම් අංශය ඇණවුම් භාරදී නැතැයි ද වාර්තාවේ.

මේ අතර තවත් සමාගමක් එන්නත් දේශීයව සකස්කර ලබාදීමටත් ආනයනය කිරීමටත් ජාතික ඖෂධ නියාමන අධිකාරියට අයැදුම්පත් යොමුකර ඇතත් මෙතෙක් ඒ සඳහාද අවසරය ලැබී නැතැයි කියති.

මෙම එන්නතේ අවශ්‍යතාව පිළිබඳව නිර්වින්දන විශේෂඥ වෛද්‍යවරුන්ගේ සංගමයේ සභාපති විශේෂඥ වෛද්‍ය විනෝදනි වනිගසේකර මෙලෙස පැවසුවාය.

‘‘මෙම ඖෂධය දැඩි සත්කාර කටයුතුවලට රෝගීන්ට ඕන වෙනවා. සංකූලතා ඇතිවූ අවස්ථාවක රුධිර පීඩනය අඩුවූ අවස්ථාවකදී අවයව බද්ධ කිරීමකදී සෝඩියම් බයි කාබනේට් අවශ්‍ය වෙනවා.

රෝගීන්ගේ රුධිරයේ පවතින ආම්ලිකතාවය අඩු කිරීමට මෙය උපකාරී වෙනවා. මෙය එදිනෙදා අවශ්‍ය වන බෙහෙතක් නෙවෙයි.

නමුත් සංකුලතා ඇතිවූ විට අවශ්‍ය වෙනවා’’ යැයි ඇය පැවසුවාය.