මෙවර මහ මැතිවරණයෙන් සමගි ජනබලවේගයට හිමි වූ ජාතික ලැයිස්තු මන්ත්‍රි ධුර පහට ට මීට පෙර දූෂණ චෝදනා හෝ වෙනත් කිසිදු ආකාරයේ චෝදනා එල්ල නොවූ පස් දෙනෙකු පත් කරන්නැයි පාක්ෂිකයන්ගෙන් ඉල්ලීම් ඉදිරිපත් වෙමින් තිබෙන බව පක්ෂ අභ්‍යන්තර ආරංචි මාර්ග අනාවරණය කරයි.

මෙවර ජාතික ලැයිස්තුවේ ස්ථාන දෙකක් පක්ෂයේ මහලේකම් රංජිත් මද්දුම බණ්ඩාරට සහ පක්ෂ සභාපති ඉමිතියාස් බාකීර් මාකර්ට වෙන්වී ඇති බව මැතිවරණයට පෙරම කතාබහ ඇති විය.

මෙම ස්ථාන දෙකෙන් පසු ඩලස් අලහප්පෙරුම, ජී.එල්. පීරිස්, සුදර්ශනී ප්‍රනාන්දු ඇතුළු පෙර පාර්ලිමේන්තුව නියෝජනය කළ මන්ත්‍රීවරු ද සජබ ජාතික ලැයිස්තුවේ සිටිති.

කෙසේ වුවද මෙවර පාර්ලිමේන්තුවේ ඇති සංයුතිය අනුව මේ තිදෙනාගෙන් වැඩි බර ඩලස් අලහප්පෙරුම වෙතට යොමුවී ඇති බව පැවසෙයි.

එසේම ඉතිරි මන්ත්‍රී ධුර දෙක සදහා උපුල් ජයසූරිය, රවි ජයවර්ධන, මහිම මෙන්ඩිස් වැනි අය වෙත අවධානය යොමු කළ යුතුව ඇතැයි වැඩි දෙනාගේ අදහස වී තිබේ. එසේම මෙවර කොළඹ දිස්ත්‍රික්කයේ 5 වැන්නා වූ එරාන් වික්‍රමරත්න ද  පාර්ලිමේන්තුවේ සිටිය යුතුම චෝදනා රහිත පුද්ගලයෙකු බව ඔවුන්ගේ අදහස වී තිබේ.

මේ අතර සජබ නියෝජනය කරමින් ජාතික ලැයිස්තු ධුර සදහා නම් කරන්නේ කවුද යන්න පිළිබදව සජබ කෘත්‍යාධිකාරී මණ්ඩලයේ සාකච්ඡාවකින් පසුව තීරණය කරන බව සජබ මහලේකම් රංජිත් මද්දුමබණ්ඩාර මහතා අද (17දා) පැවති මාධ්‍ය හමුවකදී අනාවරණය කළේය.