( තිලකරත්න දිසානායක)

දිවයිනෙහි පළමු වරට ශ්‍රවණාබාධිත පුද්ගලයන් වෙනුවෙන් සැහැල්ලු වාහන රියදුරු බලපත්‍ර ලබා දීමේ නියමු ව්‍යාපෘතියක්, ප්‍රවාහන රාජ්‍ය අමාත්‍ය ලසන්ත අලගියවන්න මහතාගේ ප්‍රධානත්වයෙන් ගම්පහ දිස්ත්‍රික් ලේකම් කාර්යාලයේදී අද ආරම්භ විණි.

ශ්‍රී ලංකා බිහිරිවූවන්ගේ මධ්‍යම සම්මේලනය මගින් 1998 වසරේ සිට කරන ලද ඉල්ලීමක් සැලකිල්ලට ගනිමින් ප්‍රවාහන රාජ්‍ය අමාත්‍ය ලසන්ත අලගියවන්න මහතාගේ මගපෙන්වීම යටතේ මෙලෙස බලපත් ලබාදීමේ නියමු ව්‍යාපෘතිය ආරම්භ කොට ඇති බව මෙහිදී ප්‍රකාශ විය.

රියදුරු බලපත් ලබා ගැනීම පිණිස මෝටර් රථ ප්‍රවාහන දෙපාර්තමේන්තුව මගින් පවත්වන ලද ලිඛිත විභාගයට පෙනී සිටි ගම්පහ දිස්ත්‍රික්කයේ ශ්‍රවණාබාධිත තැනැත්තන් 76 දෙනකු අතුරින් විභාගය සමත් වූ 44 දෙනකු සඳහා පුහුණුවීමේ තාවකාලික බලපත් ලබා දීම මෙහිදී සිදු කෙරුණු අතර මාස තුනක පුහුණුවකින් පසු ප්‍රායෝගික පරීක්ෂණයට පෙනී සිටීමෙන් අනතුරුව සමත්වන්නන්ට ස්ථිර බලපත් ලබාදීමට නියමිතය.