(මනෝප්‍රිය ගුණසේකර)

දුෂණ මර්ධන ව්‍යාපෘතියක් සඳහා ‘ජයිකා’ ආයතනයෙන් ලැබුණු රුපියල් කෝටි 2 1/2කට ආසන්න මුදලක් සම්බන්ධයෙන් විනිවිද භාවයකින් තොරව කටයුතු කළැයි කියන සිද්ධිය හේතූවෙන් ශ්‍රී ලංකා නීතීඥ සංගමයේ සභාපති කෞෂල්‍ය නවරත්න මහතාට තවදුරටත් එම ධුරයේ කටයුතු නොකර ඉවත්වන ලෙස ශ්‍රී ලංකා නීතීඥ සංගමයේ විධායක සභාව ඒ මහතාට දැනුම් දී ඇත.

නීතීඥ කෞෂල්‍ය නවරත්න මහතාට ශ්‍රී ලංකා නීතීඥ සංගමයේ සභාපතිධුරයේ තවදුරටත් කටයුතු නොකරන ලෙස දැනුම් දීමට ශ්‍රී ලංකා නීතීඥ සංගමයේ විධායක සභාව ගත් තීරණයකට අනුව මේ බව කෞෂල්‍ය නවරත්න මහතාට දැනුම් දී ඇති අතර ශ්‍රී ලංකා නීතීඥ සංගමයේ වැඩබලන සභාපතිවරයා වශයෙන් හිටපපු සභාපති ජනාධිපති නීතීඥ අනුර මැද්දේගොඩ මහතා පත් කර ඇත.

දුෂණ මර්ධන ව්‍යාපෘතියක් සඳහා ජපානයේ ජාත්‍යයන්තර සහයෝගිතා නියෝජිතායතනය හෙවත් ‘ජයිකා’ ආයතනයෙන් 2023 වර්ෂයේදී ඉදිරිපත් කළ ලංසු වලට අනුව රුපියල් මිලියන 24ක මුදලක් ලබාදී ඇති බවත් ඒ සම්බන්ධයෙන් ලංසු තැබීමේදී සහ ගිවිසුම් වලට එළැඹීමේදී පාරදෘෂ්‍ය භාවයකින් යුතුව කටයුතු නොකළ බවට ශ්‍රී ලංකා නීතීඥ සංගමයේ සභාපතිවරයා ඇතු`ථ කිහිප දෙනෙකුට එරෙහිව සමාජයේ විවිධ චෝදනා එල්ල විය.

ඒ සම්බන්ධයෙන් විමර්ශනය කර මාස 02ක කාලයක් තුළ නීතීඥ සංගමයට වාර්තා කරන දැනුම් දෙමින් ජ්‍යෙෂ්ඨ නීතීඥවරුන්ගෙන් සැදුම්ලත් පංච පුද්ගල විමර්ශන කමිටුවක් ශ්‍රී ලංකා නීතීඥ සංගමය පත් කෙරිණී.

සිද්ධිය සම්බන්ධයෙන් විමර්ශනය කිරීමට පත් කළ ජනාධිපති නීතීඥවරුන් වන කනග් ඊෂ්වරන්, ෆායිස් මුස්තාපා, ඉක්‍රම් මොහොමඩ්, රියෙන්සි අර්සකුලරත්න සහ ජෙෆ්රි අලගරත්නම් යන ජේ්‍යෂ්ඨ නීතීඥවරුන්ගෙන් සැදුම්ලත් පංච පුද්ගල විමර්ශන කණ්ඩායම විසින් සිද්ධිය සම්බන්ධයෙන් පූර්ණ විමර්ශනයක් කිරීමෙන් අනතුරුව පසුගිය මස 30 වැනිදා විමර්ශන වාර්තාව එළි දැකවිණී.