(යොහාන් භාසුර)

නීති විරෝධීව ආනයනය කළ සුවඳ විලවුන් සහ ආලෝපන අඩංගු බහලුමක් රේගු පරීක්‍ෂණ කටයුතු සඳහා නවතා තිබියදී ව්‍යාජ ලේඛණ සකස්කර රේගුවෙන් නිදහස් කළ නිලධාරීන් සිවුදෙනා සම්බන්ධයෙන් විශේෂ පරීක්‍ෂණයක් ක්‍රියාත්මක බව රේගු මාධ්‍ය ප්‍රකාශක, අතිරේක රේගු අධ්‍යක්‍ෂ ජනරාල් සීවලි අරුක්ගොඩ මහතා ‘ලංකාදීප’යට පැවසීය.

අදාල සිද්ධිය සම්බන්ධ නිලධාරීන්ගේ වැඩතහනම් කිරීම පරීක්‍ෂණය පැවැත්වීමේ පළමු පියවර බවත් රේගු දෙපාර්තමේන්තුව අදාල සිද්ධිය සම්බන්ධයෙන් විශේෂ අවධානයක් යොමු ක්‍රියාත්මකව සිටින බවත් කීය.

මෙවැනි සිද්ධියකට ක්‍රියාමාර්ගගැනීමට රේගු පනතේ සහ ආයතන සංග්‍රයේ අවශ්‍ය සියලු ප්‍රතිපාදන ඇති බව කී අරුක්ගොඩ මහතා ඒ අනුව කටයුතු කිරීම ප්‍රමාණවත් බව ද සඳහන් කළේය.

රේගුවට අයත් ‘ග්‍රේ ලයින් 2’ භාණ්ඩ පරීක්‍ෂණ අංගයේ රඳවා තිබූ මෙම බහලුම රුපියල් 120,000 ක ඉතාමත් අඩු දඩයක් නියම කර නිදහස් කිරීම වඩාත් බරපතල ගැටලුව බවට පත්ව ඇති බව කී අරුක්ගොඩ මහතා රේගු දෙපාර්තමේන්තුවේ කීර්තිනාමයට මෙම සිද්ධිය හේතුවෙන් දැඩි හානියක් වූ බවත්ය.

එම බහලුම ව්‍යාජ ලේඛණ සකස්කර රේගුවෙන් නිදහස් කිරීමේ චෝදනාවට ජ්‍යෙෂ්ඨ රේගු අධ්‍යක්‍ෂවරයෙක්, නියෝජ්‍ය රේගු අධ්‍යක්‍ෂවරියක්, නියෝජ්‍ය රේගු අධ්‍යක්‍ෂවරයෙක් සහ රේගු අධිකාරිවරයෙක් මේ වන විට වැඩතහනමට ලක්කර ඇති අතර පසුගිය 12 වැනිදා බහලුම නිදහස් කර ඇති බව වාර්තා වේ

එහි තිබූ සුවඳ විලවුන් සහ ආලෝපන ඊයේ (21) පස්වරුව දක්වා සොයාගැනීමට නොහැතිව තිබුණි.