(බිමල් ශ්‍යාමන් ජයසිංහ)

තලංගම  තලවතුගොඩ ප්‍රදේශයේ පදිංචි දිවයිනේ ප්‍රසිද්ධ ව්‍යාපාරික යුවළකට ඩුබායි රාජ්‍යයේ සිට හා මෙරට සිට දුරකතන ඇමතුම් ලබා දෙමින් මරණ තර්ජන සිදු කරමින් රුපියල් ලක්ෂ 50 ක කප්පම් මුදලක් ලබා ගැනීමට තැත් කළ     සැකකරුවන් දෙදෙනෙකුගෙන් එක් අයෙකු  අත්අඩංගුවට ගත් බව නුගේගොඩ කොට්ඨාශ අපරාධ මර්දන මෙහෙයුම් ඒකකය පවසයි.

එම සැකකරු සන්තකයේ තිබී අයිස් මත්ද්‍රව්‍ය  මිලිග්‍රෑම් 7100 ක් පොලිස් භාරයට ගෙන ඇත

 ව්‍යාපාරිකයාට දුරකථන ඇමතුම් ලබාදී බිය වැද්දීම හේතුවෙන් විශාල කම්පනයකට හා භීතියකට පත්ව සිටි ඔහු  වැඩ බලන පොලිස්පතිවරයාට පැමිණිලි කිරීමෙන් අනතුරුව ඒ සම්බන්ධයෙන් විමර්ශනයක් සිදු කිරීම සඳහා නුගේගොඩ කොට්ඨාස බාර ජ්‍යෙෂ්ඨ පොලිස් අධිකාරිවරයාට භාරදීමෙන් පසු පොලිස් අධිකාරීවරයාගේ නියෝග මත පරීක්ෂණ ආරම්භ කළ නුගේගොඩ කොට්ඨාශය අපරාධ මෙහෙයුම් ඒකකයේ නිලධාරීන් විසින් අධිකරණයට කරුණු වාර්තා කිරීමට පියවර ගෙන ඇත

ඒ අනුව දුරකථන විශ්ලේෂණ වාර්තා කැඳවා මෙරට දුරකථන අංකයක් හඳුනා ගැනීමෙන් පසු සිදුකළ දීර්ඝ විමර්ශනයේදී පන්නල ප්‍රදේශයේ සිට දුරකථන ඇමතුම් ලබාදුන්  සැකකාර පුද්ගලයා එම ප්‍රදේශයේදීම අත්අඩංගුවට ගත් බව පොලිසිය පැවසීය.