(සුජිත් හේවාජුලිගේ)

ලබාගත් විදුලිය  වෙනුවෙන් පාරිභෝගිකයන්  විදුලිබල මණ්ඩලයට  ගෙවීම මේ දක්වා   පැහැර හැර ඇති මුදල රුපියල් කෝටි 4800ක් දක්වා ඉහළ නැග ඇතැයි  එම මණ්ඩලයේ සාමාන්‍යාධිකාරී  එම්.ආර් රණතුංග මහතා ලංකාදීපයට පැවැසීය.

මේ හේතුවෙන් මතුවී ඇති මූල්‍යමය අර්බුදය නිසා විදුලිබල  මණ්ඩලයේ  කොන්ත්‍රාත්කරුවන්ට  සහ පෞද්ගලික විදුලි නිෂ්පාදකයන්ට මුදල් ගෙවීම මේවනවිට  බරපතළ ගැටලුවක්වී  ඇතැයි සඳහන් කළ සාමාන්‍යාධිකාරීවරයා  පෞද්ගලික විදුලිය නිෂ්පාදකයන්ට  මාස හයෙන් හයට  මුදල් ගෙවීමට කටයුතු කරගෙන යන බවද සඳහන් කළේය.

මූල්‍ය අර්බුදය හේතුවෙන් විදුලිබල මණ්ඩලයේ සේවකයන්ට මේ මාසයේ වැටුප් ගෙවනු ලැබුවේද ඉතාම දුෂ්කරව බවත් මණ්ඩලයේ  කටයුතු සඳහා කෝටි 2,500ක බැංකු ණයක්  ලබා ගැනීමට සිදුවූ  බවත් ඔහු ප්‍රකාශ කළේය.

විදුලිය වෙනුවෙන් පාරිභෝගිකයන් ගෙවීමට ඇති හිඟ මුදල   එල් එම්.ජී බලාගාරයක් ඉදිකිරීමට යන මුදලට සමාන එකක්  බවද  හෙතෙම සඳහන් කළේය.

මෙම හිඟ මුදල මීට මාස කිහිපයකට පෙර පැවතුණේ  රුපියල් කෝටි 4500ක්  ලෙස යැයි  විදුලිබල බල මණ්ඩලය පවසයි.

ඉදිරි දින කිහිපයේදීවත් තම හිඟ විදුලි  බිල්පත් නොපමාව ගෙවීමට කටයුතු කරන්නැයි  විදුලිබල මණ්ඩලයේ සාමාන්‍යාධිකාරිවරයා ජනතාවගෙන් ඉල්ලීමක් කරයි.