පාර්ලිමේන්තු මන්ත්‍රී රිෂාඩ් බදුර්දීන් මහතා සිටින ස්ථානයක් සොයාගත නොහැකි වූ බැවින් ඔහුගේ ආරක්ෂක නිලධාරියකු අපරාධ පරීක්ෂණ දෙපාර්තමේන්තුවේ  නිලධාරීන් කණ්ඩායමක් විසින් අද අත්අඩංගුවට ගනු ලැබ තිබේ. ඔහුව අත්අඩංගුවට ගෙන ඇත්තේ රිෂාඩ් බදුර්දීන් මහතාට සැඟවී යාමට ආධාර උපකාර කිරීම හේතුවෙන් බව උසස් පොලිස් නිලධාරියෙක් පැවසීය. 

“මේ ඉන්නේ මන්ත්‍රීවරයාගේ ආරක්ෂක නිලධාරියෙක්. මන්ත්‍රීවරයා ඉන්න තැන මෙයා නොදැන ඉන්නේ කොහොමද ?“ යන පදනම මත ආරක්ෂක නිලධාරියා අත්අඩංගුවට ගෙන ඇත. රිෂාඩ් බදුර්දීන් මහතා භාවිතා කළ වාහන දෙකක් සහ ආයුධ දෙකක් ද රහස් පොලිසිය විසින් අත්අඩංගුවට ගෙන ඇති බවද වාර්තාවේ. 

මේ අතර රිෂාඩ් බදුර්දීන් මහතාගේ අමාත්‍යංශයක ගණකාධිකාරීවරයකු වන අලගරත්නම් මනෝරන්ජන් මහතාද අපරාධ පරීක්ෂණ දෙපාර්තමේන්තුවේ  නිලධාරීන් කණ්ඩායමක් විසින් අත්අඩංගුවට ගෙන තිබේ.  අලගරත්නම් මනෝරන්ජන් මහතා අත්අඩංගුවට ගෙන ඇත්තේ කිරුළපනේදීය.  

පාර්ලිමේන්තු මන්ත්‍රී රිෂාඩ් බදුර්දීන් මහතා සමගින් අත්අඩංගුවට ගන්නා ලෙස නීතිපතිවරයා විසින් නියෝග කළ තිදෙනා අතර මනෝරන්ජන් මහතා ද සිටී.  අපරාධ පරීක්ෂණ දෙපාර්තමේන්තුවේ කණ්ඩායම් හයක් මේ වන විට පාර්ලිමේන්තු මන්ත්‍රී රිෂාඩ් බදුර්දීන් මහතා සොයමින් සිටින අතර, ඔහු අත්අඩංගුවට ගන්නා ලෙස නීතිපතිවරයා පොලිසියට නියෝග කර තිබේ. 

මහජන මුදල් සාපරාධී ලෙසත් අයථා ලෙසත් පරිහරණය කිරීම සහ මැතිවරණ නීති උල්ලංඝනය කිරීම යන චෝදනා මත පාර්ලිමේන්තු මන්ත්‍රී රිෂාඩ් බදුර්දීන් මහතා අත්අඩංගුවට ගන්නා ලෙස නීතිපතිවරයා වැඩබලන පොලිස්පතිවරයාට ඊයේ (13 වැනිදා) නියම කළේය.

2019 ජනාධිපතිවරණයේදී ඡන්දය ප්‍රකාශ කිරීම සඳහා අභ්‍යන්තර අවතැන්වූවන් පුත්තලම් සිට මන්නාරම දක්වා ලංගම බස් 222 කින් ප්‍රවාහනය කළ බවට හිටපු අමාත්‍ය රිෂාඩ් බදුර්දීන් මහතාට චෝදනා එල්ල වී තිබේ. මැතිවරණ සමයේදී අවතැන්වූවන් ප්‍රවාහනය කිරීමේ ව්‍යාපෘතිය භාරව සිටි රිෂාඩ් බදුර්දීන් මහතාගේ ගණකාධිකාරීවරයා ලෙස සේවය කළ බව වාර්තා වේ.