(ඩයනා උදයංගනී)

අග්‍රාමාත්‍යවරයා සහ විදේශ කටයුතු ඇමතිවරයා ඉතාලි සංචාරයේදී වතිකානයට ගොස් බොරු කියා පාප් වහන්සේ පවා නොමග යැවීමට උත්සාහ ගන්නා බව පෙනෙන්නේ යැයි මැල්කම් කාදිනල් රංජිත් කොළඹ අගරදගුරුතුමෝ පැවසූහ.

ඔවුන්ගේ වතිකාන ගමන පාස්කු ඉරුදින එල්ල වූ ත්‍රස්ත ප්‍රහාරයේ සත්‍ය යටගැසීමට රජය ගෙන යන ව්‍යාපාරයේ තවත් තුරුම්පුවක් බවත් එම වැඩපිළිවෙල තරයේ හෙළා දකින බවත් කාදිනල්තුමෝ පැවසූහ.

කාදිනල්තුමන් මේ බව පැවසුවේ කොළඹ අගරදගුරු මැදුරේදී අද (8) පැවති මාධ්‍ය හමුවක් අමතමිනි.

හිටපු ජනාධිපති මෛත්‍රීපාල සිරිසේන මහතා සම්බන්ධයෙන් ද නීති ක්‍රියාමාර්ගය ගත යුතු බව ජනාධිපති කොමිෂන් සභාව නිර්දේශ කර තිබුණත් රජය ඔහු ආරක්ෂා කරන්නට යන බව පෙනෙන්නේ යැයි කී කාදිනල්තුමෝ චෝදනා ඇති සමහරුන්ව ආරක්ෂා කරන්නට රජය උත්සාහ කරන්නේ ඔවුනුත් මේ ප්‍රහාරයේ කොටස්කරුවන් නිසාද යන සැකයක් තමාට ඇතිවන බව පැවසූහ.

එමෙන්ම මේ ගැන චෝදනා එල්ල වී ඇති පොලීසියේ නිලධාරීන් පිරිසක් මහ නා හිමිවරු හමුවී ඔවුන්ට අසාධාරණයක් වී ඇතැයි ප්‍රකාශ කිරීම අනුමත නොකරන බව කී කොළඹ අගරදගුරුතුමෝ ජාතිය ආගම මත කිසිවෙක් බේරා ගැනීමට නොහැකි බවත් කතෝලික අයකු වරදක් කර තමා හමුවට ආවා නම් ඔවුන් පිළිනොගන්නා බවත් පැවසූහ.

ඔවුන්ට චෝදනාවක් ඇත් නම් අධිකරණය හමුවට යා යුතු බව ද කාදිනල්තුමෝ කීහ.

රජය ජාත්‍යන්තරයට ගොස් හැංගෙන්නට උත්සාහ කිරීම අනුමත නොකරන බව කී කාදිනල්තුමෝ එසේ ගොස් බාල්දු වෙන්නට එපා යැයි අගමැතිවරයාටත් විදේශ ඇමතිවරයාටත් දැනුම් දෙන බවද සඳහන් කළහ.

එම උත්සාහය ඔවුන්ගේම හිසට වැදෙන්න ඉඩ ඇති බවත් මේ සිද්ධීන් සම්බන්ධයෙන් ජිනීවා මානව හිමිකම් කොමිසම දැනුවත් කරන බව වතිකානයේ සාධාරණය හා යුක්තිය පිළිබඳ කටයුතු කරන පියතුමා තමාට දැනුම් දී ඇතැයි ද කාදිනල්තුමෝ පැවසූහ.