මාවනැල්ල ප්‍රාදේශීය සභාවේ සභාපති ලෙස කටයුතු කළ රංකොත් පේඩිගේ නොයෙල් දසන්ත ස්ටීවන් මහතාගේ ධූරය 2023 පෙබරවාරී මස 14 වන දින සිට ක්‍රියාත්මක වන පරිදි සබරගමු පළාත් ආණ්ඩුකාර ටිකිරි කොබ්බෑකඩුව මහතා විසින් තාවකාලිකව අත් හිටුවනු ලැබීය.

සබරගමු පළාත් ආණ්ඩුකාරවරයා විසින් ඔහුට පැවරී ඇති බලතල ප්‍රකාරව  2023/02/14 දින අංක 2319/38 දරණ අති විශේෂ ගැසට් පත්‍රය මඟින් මාවනැල්ල ප්‍රාදේශීය සභා සභාපතිවරයාගේ ධූරය මෙලෙස තාවකාලිකව අත්හිටුවා ඇත.

1989 අංක 12 දරණ පළාත් සභා (ආනුෂංගික විධි විධාන) පනතේ දෙවන වගන්තිය සමඟ කියවිය යුතු සහ 1987 අංක 15 දරණ ප්‍රාදේශීය සභා පනතේ 185 (3) (අ) (i) වගන්තිය යටතේ සබරගමු පළාත් ආණ්ඩුකාරවරයා විසින් මෙය ක්‍රියාත්මක කර ඇත.

එම පනතේ ඉහත වගන්තිය ප්‍රකාරව සබරගමු පළාත් ආණ්ඩුකාර ටිකිරි කොබ්බෑකඩුව මහතා විසින් වහාම ක්‍රියාත්මක වන පරිදි මාවනැල්ල ප්‍රාදේශීය සභාවේ සභාපති ධූරය සදහා එම ප්‍රාදේශීය සභාවේ උප සභාපති ලෙස කටයුතු කළ කෝරලේ ගෙදර පියතිස්ස මහතා පත් කර ඇත.