(සිතුම් චතුරංග)

මන්නාරම රෝහලට අනවසරයෙන් ඇතුලුවී වෛද්‍යවරුන්ගේ රාජකාරියට බාධා කරමින් හැසිරුණු චාවකච්චේරි  රෝහලේ හිටපු වෛද්‍ය අධිකාරීවරයා අත්අඩංගුවටගත් බව මන්නාරම පොලිසිය කියයි.

මන්නාරම රෝහලේ ප්‍රතිකාර ලබමින් සිටියදී පසුගියදා මියගිය එක්දරු මවක් සම්බන්ධයෙන් සහ මන්නාරම රෝහලේ පවතින ගැටළු සම්බන්ධයෙන් සොයාබැලීම සඳහා වෛද්‍ය අධිකාරීවරයා එලෙස මන්නාරම රෝහලට පැමිණ තිබුණි.

එම අවස්ථාවේ වෛද්‍යවරයා මන්නාරම රෝහලේ සේවයකරන වෛද්‍යවරුන්ගේ රාජකාරියට බාධාකරමින් සහ රෝහල තුල නොසන්සුන් තත්වයක් ඇතිවන ආකාරයෙන් ක්‍රියා කිරීම සම්බන්ධයෙන් රෝහල් පරිපාලනයෙන් ලැබුණ පැමිණිලි මත එලෙස ඔහු අත්අඩංගුවටගත් බව පොලිසිය පැවසීය.

චාවකච්චේරි රෝහලේ ඇතුළු උතුරු පළාතේ රෝහල් රැසක සිදුවන අක්‍රමිකතා සම්බන්ධයෙන් දිගින් දිගටම සමාජ මාධ්‍යන් ඔස්සේ අනාවරණයන් සිදුකළ වෛද්‍යවරයකු වන අතර එම ප්‍රකාශ සම්බන්ධයෙන් වෛද්‍යවරුන්ගේ විරෝධතාවයන් සමඟ ඔහු පේරාදෙණිය ශික්ෂණ රෝහලට ස්ථානමාරුකරනු ලැබීය.

මියගිය එක්දරු මව දරුවකු ප්‍රසූතකිරීමෙන් අනතුරුව ප්‍රතිකාර ලබමින් සිටියදී අධික රුධිර වහනයවීම හේතුවෙන් මියගොස් සිටි අතර ඒ සම්බන්ධයෙන් මියගිය කාන්තාවගේ ඥාතීන් විසින් ප්‍රතිකාරකළ රෝහල් වෛද්‍යවරුන් සම්බන්ධයෙන් සැකයක් පවතින බවට රෝහල් අධ්‍යක්ෂවරයා වෙත පැමිණිලි කොට තිබුණි.