(ගයාන් සූරියආරච්චි)

නීතිවිරෝධි මත්ද්‍රව්‍ය සම්බන්ධයෙන් බුද්ධි ආවේක්ෂණ රාජකාරි මෙහෙයුම් වැඩි කරන ලෙස යුද හමුදාපති ලුතිතන් ජනරාල් ලසන්ත රොද්‍රිගෝ මහතා ආරක්ෂක සේනා ආඥාපතිවරුන් ඇතුළු සියලුම පාර්ශවවලට උපදෙස් ලබාදී ඇති බව යුද හමුදාව පවසයි.

ඉකුත් වසරේ යුද හමුදාව රැස්කරගත් බුද්ධි තොරතුරුවලට අනුව පොලීසිය සහ පොලිස් විශේෂ කාර්ය බළකාය සමඟ සිදුකළ වැටලීම්වලදී නීතිවිරෝධී මත්ද්‍රව්‍ය ජාවාරමේ යෙදුණු සැකකරුවෝ 451 දෙනෙක් අත්අඩංගුවට ගනු ලැබූහ.

යුද හමුදාව සිදුකළ වැටලීම්වලදී ගංජා කිලෝග්‍රෑම් 3570ක්, කේරළ ගංජා කිලෝග්‍රෑම් 1040ක්, අයිස් කිලෝග්‍රෑම් 11 කට ආසන්න ප්‍රමාණයක් සහ හෙරොයින් කිලෝ ග්‍රෑම් 61කට ආසන්න ප්‍රමාණයක් අත්අඩංගුවට ගෙන තිබුණි.

එසේම නීති විරෝධී දේශීය මත්පැන් ලීටර් 850 කට ආසන්න ප්‍රමාණයක් සහ ගෝඩා ලීටර් 15000කට ආසන්න ප්‍රමාණයක් ද , විදේශීය මත්පැත් බෝතල් 68ක ප්‍රමාණයක් අත්අඩංගුවට ගෙන පොලීසියට භාර දී ඇත.

මීට අමතරව නීතිවිරෝධීව මෙරටට ගෙන්වන ලද බීඩි කොළ කිලෝග්‍රෑම් 7340කට ආසන්න ප්‍රමාණයක්ද අත්අඩංගුවට ගෙන තිබුණි.

යුද හමුදාව රැස්කළ බුද්ධි තොරතුරුවලට අනුව  පොලීසිය සහ විශේෂ කාර්ය බළකාය සමඟ සිදුකළ වැටලීම්වලදී කොටහේන, මාලිගාවත්ත, කොල්ලුපිටිය, මීගමුව සහ වේල්ලවීදිය යන ප්‍රදේශවලදී  නීතිවිරෝධී දුම්වැටි 170,000කට ආසන්න ප්‍රමාණයක් අත්අඩංගුවට ගැනීමට හැකියාව ලැබී ඇත.

එසේම යාල රක්ෂිතය, උඩවලව ප්‍රදේශවලදී ගංජා කිලෝග්‍රෑම් 3459කට ආසන්න ප්‍රමාණයක් සහ ගංජා පැළ 440,000කට ආසන්න ප්‍රමාණයක් අත්අඩංගුවට ගෙන තිබුණි.