(ඩයනා උදයංගනී)

භූමිතෙල් සඳහා සහනයක් අවශ්‍ය පිරිස්වලට මූල්‍ය ආධාරයක් ලබා දී භූමිතෙල් මිල ද සංශෝධනය කිරීමට බලාපොරොත්තු වන බව සම කැබිනට් ප්‍රකාශක, විදුලිබල හා බලශක්ති අමාත්‍ය, කාංචන විජේසේකර මහතා පැවසීය.

භූමිතෙල් ලීටරයක් රුපියල් 87 කට අලෙවි කිරීමෙන් ඛනිජ තෙල් නීතිගත සංස්ථාව රුපියල් 275.26ක අලාභයක් ලබන බව අමාත්‍යවරයා සඳහන් කළේය

භූමිතෙල් සඳහා සහනාධාරයක් දියයුතු ධීවර, වතු කම්කරු පිරිස් ඇතුළු අඩු ආදායම්ලාභී පිරිස් වෙත ධීවර පරීක්‍ෂක, තේ පරීක්‍ෂක, ප්‍රාදේශීය ලේකම්වරුන්ගෙන් සමන්විත කමිටුවක් හරහා මාසිකව මුදල් ආධාරයක් දීමේ වැඩපිළිවෙලක් සැලසුම් කරන බව ද හෙතෙම කීවේය.

අමාත්‍ය කාංචන විජේසේකර මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (24) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

අඩු මිලට භූමිතෙල් අලෙවි කිරීම නිසා විවිධ පිරිස් එය අවභාවිතා කරන බව කී ඇමතිවරයා මේ දිනවල ඉවුම් පිහුම් සඳහාත් විශාල පිරිසක් භූමිතෙල් ලබාගන්නා බව පැවසීය.

ඇතැම් බස් රථ රියදුරන් ඩීසල් වැඩිවන විට භූමිතෙල් තොග රැස්කරමින් ඒවා යොදා ප්‍රවාහන කටයුතුවල යෙදෙන බව කී ඇමතිවරයා ඇතැමුන් සියයට සියයක් භූමිතෙල්වලින් ධාවනය කරන බව නිරීක්‍ෂණය වී තිබෙන බව ද ප්‍රකාශ කළේය.

බස්රථවල දුම් සහතික ලබාදීමේදී ඔවුන් භාවිතා කර ඇත්තේ ඩීසල් ද භූමිතෙල්දැයි විමර්ශනය කරන ලෙස ප්‍රවාහන ඇමතිවරයාගෙන් ඉල්ලීමක් කරන බව ද විජේසේකර මහතා පැවසීය.

මෙම තත්වය නිවරදි කරන තුරු භූමිතෙල් නිකුත් කිරීම සීමා කර ඇතැයි ද ඇමතිවරයා කීය.