(යොහාන් භාසුර)

ශ්‍රී ලංකා පොදුජන පෙරමුණේ වර්තමාන පළාත් පාලන නියෝජිතයන්  ඡන්දයට සූදානම් බවත් එම ඡන්දය ජනතාව අපහසුතාවට පත්වන දේවල් නොවන අවස්ථාවක පැවැත්විය යුතු බවත් ශ්‍රී ලංකා පොදුජන පෙරමුණේ පළාත් පාලන ප්‍රධානීන් ජනාධිපති රනිල් වික්‍රමසිංහ මහතාට පැවසූවේ යැයි එම පක්‍ෂයේ මහ ලේකම් පාර්ලිමේන්තු මන්ත්‍රී, නීතිඥා සාගර කාරියවසම් මහතා පැවසීය.

පොදුජන පෙරමුණේ පළාත් පාලන නියෝජිතයන් ගමට වැඩ කර තිබීම නිසා ඡන්දයකදී ජනතාව ඉදිරියට යෑමට කිසිඳු බයක් නොමැති බවත් ඡන්ය සූදානම් කර තිබියදී විදුලි කප්පාදුවක්, ඉන්ධන හිඟයක් හෝ ආහාර හිඟයක් පැවතිය හොත් ජනතාව ඒවා පිළිබඳව අවධානය යොමු කර තීන්දු ගැනීම වැලැක්විය නොහැකි නිසා ඡන්දයකට සුදුසු වාතාවරණයක් සකස් කරන ලෙස ඉල්ලා සිටි බවත් කාරියවසම් මහතා කීය.  

හිටපු ජනාධිපති ගෝඨාභය රාජපක්‍ෂ මහතාගේ කාලයේ පළාත් පාලන ආයතනවලට සේවයින් බඳවාගැනීම ඇතුළු අත්හිටුවීමවලට සහ අත්හිටුවා ඇති පොදු සේවා නැවත ආරම්භ කිරීමට මෙහිදී ජනාධිපතිවරයාගෙන් විසඳුම් ඉල්ලා සිටි බවත් ඡන්දයකදී පළාත් පාලන ආයතනවලින් පරිබාහිර කටයුතුවලින් ශ්‍රී ලංකා පොදුජන පෙරමුණට හානියක් වීමට ඉඩ නොදෙන ලෙස ඉල්ලා සිටි බවත් ලේකම්වරයා වැඩි දුරටත් සඳහන් කළේය.

ශ්‍රී ලංකා පොදුජන පෙරමුණේ පළාත් පාලන ආයතන ප්‍රධානීන් සහ ජනාධිපති රනිල් වික්‍රමසිංහ මහතා අතර පැවැති විශේෂ සාකච්ඡාව පිළිබඳව කළ විමසුමකදී එම පක්‍ෂයේ මහ ලේකම් පාර්ලිමේන්තු මන්ත්‍රී, නීතිඥා සාගර කාරියවසම් මහතා එසේ පැවසීය.