(අංජුල මහික වීරරත්න)

පාස්කු බෝම්බ ප්‍රහාරයේ නියම වගකිව යුත්තාට දඬුවම් කිරීමට අවශ්‍ය නම් ආණ්ඩුව කළ යුත්තේ හිටපු ජනාධිපති මෛත්‍රිපාල සිරිසේන හතරවෙනි තට්ටුවට ගෙන ගොස් ප්‍රශ්න කර අධිකරණයේ නඩු පැවරීම බව එක්සත් ජාතික පක්ෂ මහා ලේකම් පාලිත රංගෙ බණ්ඩාර මහතා පැවසීය.

මෛත්‍රීපාල සිරිසේන මහතාම කොමිසමක් පත් කර හිටපු පොලිස්පති පුජිත් ජයසුන්දරට සහ හිටපු ආරක්ෂක ලේකම් හේමසිරි ප්‍රනාන්දුට නඩු පවරන්න කටයුතු කළ අතර අධිකරණය නීතිපති ගත් ක්‍රියා මාර්ගය විවේචනය කරමින් විත්ති වාචකයක් කැඳවීමකින් තොරව ඔවුන් දෙදෙනා නිදොස් කර නිදහස් කරන්න පියවර ගත් බවද එජාප මහලේකම්වරයා කීය.

පාස්කු බෝම්බ සිද්ධියේ ප්‍රධාන වගකිව යුත්තා හිටපු ජනාධිපති මෛත්‍රිපාල සිරිසේන මහතා බව ඕන අන්ධයෙකු බිහිරෙකු ගොළුවෙකු වුවත් දන්නා බව කී රංගෙ බණ්ඩාර මහතා ඊට ඇස් පනාපිට සාක්කි තිබෙන බවද පැවසීය.