පෝලන්තයේ ඉරිදා (10) පැවැත්වීමට නියමිතව තිබූ ජනාධිපතිවරණය කල් දැමීමට තීරණය කර ඇතැයි වාර්තා වේ. 

කොරෝනා වයිරසය දරුණු ලෙස පැතිරීම හේතුවෙන් මෙම තීරණය ගැනීමට සිදුවී ඇති අතර එයට පෝලන්තයේ පාලක සභා පක්ෂ එකඟ වී තිබේ.

ඡන්දය පැවැත්වීමේ දිනය හැකි ඉක්මනින් තීරණය කරන බවත් එය තැපැල් ඡන්ද විමසීමක් පමණක් වනු ඇති බවත් බලධාරීහු පවසති.

බීබීසි සේවය පවසන්නේ පවතින සෞඛ්‍ය අර්බුදය හමුවේ මැතිවරණය පැවැත්වීම සම්බන්ධයෙන් පෝලන්තය බරපතල දේශපාලන අර්බුදයකට ඇද දමා ඇති බවයි.

අගුලු දැමීම හේතුවෙන් අපේක්ෂකයින් මැතිවරණ ප්‍රචාරක කටයුතු අත්හිටුවා ඇති බැවින් මැතිවරණය විනිවිද භාවයෙන් හා සාධාරණව පැවැත්වීමට නොහැකි වනු ඇතැයි ජාත්‍යන්තර නිරීක්ෂකයින් ද අනතුරු අඟවා තිබිණි.

පෝලන්තයේ වත්මන් ජනාධිපති ඇන්ඩ්‍රෙජ් ඩුඩා මහතා ද ජනාධිපතිවරණයට ඉදිරිපත් වී ඇති අතර ඔහුගේ විරුද්ධවාදීන් පවසන්නේ ජනාධිපතිවරයා දිනපතා රාජ්‍ය මාධ්‍යයන්හි පෙනී සිටින බැවින් ස්වාධීන මැතිවරණයක් පැවැත්විය නොහැකි බවයි.

පෝලන්තයේ මේ වනවිට නොරෝනා ආසාදිත රෝගීන් 15 000කට ආසන්න පිරිසක් සිටින බවත් මරණ 700කට වැඩි ප්‍රමාණයක් සිදුවී ඇති බවත් ඇමරිකාවේ ජෝන් හොප්කින්ස් විශ්ව විද්‍යාල වාර්තා සඳහන් කරයි.

(බීබීසී ඇසුරිණි - 085)