(මොරගහහේන - කේ බුද්ධික කුමාරසිරි)

ශ්‍රී ලංකා පොදුජන පෙරමුනේ හොරණ ආසන බල මණ්ඩලය අද (03) පැවැති අවස්ථාවේදී කළුතර දිස්ත්‍රික් පාර්ලිමේන්තු මන්ත්‍රි විදුර වික්‍රමනායක මහතා විසින් එම බල මණ්ඩලයේ සභාපතිවරයා ලෙස හොරණ ප්‍රාදේශීය සභාවේ සභාපතිවරයා යෝජනා කිරීමත් සමග දැඩි උණුසුම් තත්වයක් ඇති විය.

ශ්‍රී ලංකා පොදුජන පෙරමුණේ ව්‍යවස්ථාවට අනුව ආසන බල මණ්ඩලයේ සභාපතිවරයා නිල බලයෙන් ආසනයේ ප්‍රධාන සංවිධායකවරයා බවට පත් වෙන බැවින් විදුර වික්‍රමනායක මහතාගේ එම යෝජනාව සම්බන්ධයෙන් පළාත් පාලන මන්ත්‍රීවරුන් ඇතුළු ක්‍රියාකාරීන් සිය විරෝධතාවය පල කරන ලදී.
හොරණ මහරගම පාරේ උත්සව ශාලාවකදී මෙම ආසන බල මණ්ඩලය පැවැත්විණි.

අදාල බල මන්ඩල රැස්වීම ආරම්භ වූ අවස්ථාවේ සිටම ජනතාව අතර සිටි මන්ත්‍රිවරයා ප්‍රථමයෙන්ම ආසන බල මණ්ඩලය අමතා එහි නිලධාරී මණ්ඩලය පත් කර ගන්නා ලෙස දැනුම් දෙන ලදී. එහිදී නව ආසන බල මණ්ඩලයේ සභාපතිවරයා ලෙස හොරණ ප්‍රාදේශීය සභාවේ සභාපති අශෝක රණතුංග මහතා යෝජනා කරන බව විදුර වික්‍රමනායක මහතා පැවසූ අතර එම යෝජනාව සභ සම්මත විය.  

පසුව නැවතත් ක්‍රියාකාරීන් ඇමතූ මන්ත්‍රිවරයා විසින් ආසන බල මණ්ඩල සභාපතිවරයා නිල බලයෙන් ආසනයේ සංවිධායකවරයා ද වන බැවින් ඔහුට සුබ පතන බව පවසමින් වේදිකාවෙන් බැස යාමත් සමග එම ස්ථානයට සහභාගී වී සිටි පලාත් පාලන මන්ත්‍රීවරුන් සහ ක්‍රියාකාරීන් ප්‍රධාන සංවිධායකවරයා ලෙස විදුර වික්‍රමනායක මහතා පත් විය යුතු බව පවසමින් ඝෝෂා කරන්නට විය.

ඒ අනුව නැවතත් සභාව ඇමතූ විදුර වික්‍රමනායක මහතා පැවසූවේ අශ්වයා නාවන්නට ගඟ ළඟට ඇදගෙන ගිය හැකි මුත් ජලය පොවන්නට ඔබලාට නොහැකි බැවින් මේ අවස්ථාවේ තමන්ට එම ධූරය භාර ගත නොහැකි බැවින් අදාල තීරණයට සහයෝගය ලබා දෙන ලෙස ඉල්ලා සිටියේය.

ඒ අනුව පිරිස විසිර යාමට කටයුතු සිදු විය.