(බිමල් ශ්‍යාමන් ජයසිංහ)

වැල්ලවත්ත හැව්ලොක් පාරේ සුපිරි නිවාස සංකීර්ණයක රැඳී සිටිමින් අන්තර්ජාලය හරහා මුදල් වංචා කිරීමේ යෙදී සිටි සංවිධානාත්මක කණ්ඩායමකට අයත් පුද්ගලයන් 58 දෙනකු අඩංගුවට ගත් බව අපරාධ පරීක්ෂණ දෙපාර්තමේන්තුව කියයි.

එම සැකකරුවන් සහ සැකකාරියන් අතර එහි අධ්‍යක්ෂකවරියක් බව කියන කොළඹ 07 පදිංචි 52 හැවිරිදි කාන්තාවක හා කළමනාකරුවකු ලෙස කටයුතු කළ රාගම පදිංචි 40 හැවිරිදි පුද්ගලයකුද වන බව පොලිසිය කියයි.

අත්අඩංගුවට ගත් සැකකරුවන්  ශ්‍රී ලාංකිකයන් බව පොලිසිය කියයි.

අධිකරණය හරහා ලබා ගත් සෝදිසි වරෙන්තුවක් අනුව එම වැටලීම සිදුකරඇත.

එම නිවාස සංකීර්ණයේ නිවසක රැදි සිටිමින් නීති විරෝධී අයුරින් කණ්ඩායමක් අන්තර්ජාලය ඔස්සේ මුදල් වංචා කරන බවට අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකයට ලැබුණු තොරතුරක් අනුව සැකකරුවන් අත්අඩංගුවට ගෙන ඇත.

කොරියන් ජාතිකයකුගෙන් රුපියල් කෝටි 30 කට ආසන්න මුදලක් වංචා කිරීමේ සිද්ධියක් සම්බන්ධයෙන් එම පැමිණිල්ල සිදුකර තිබිණි.

විදේශීය රටක සිට මෙම ජාවාරම මෙහෙයවන බවත් විදේශික පුද්ගලයන් ඉලක්ක කර එහි ප්‍රධාන කඳවුර ලෙස හැව්ලොක් පාරේ සුඛෝභෝගී නිවාස සංකීර්ණයේ මෙම නිවස පවත්වාගෙන ගොස් ඇති බව පොලිස් විමර්ශනවලදී අනාවරණයවී ඇත.