(මොහොමඩ් ආසික්)

දේශපාලනයේ අත් දැකීම් තියෙනවා යැයි කියන පිරිසට තියෙන්නේ හොරකම් කරන බොරු කරන ජනතාවව රවට්ටන අත්දැකීම් යැයි අගමැතිනි ආචාර්ය හරිනි අමරසූරිය මෙනෙවිය ප්‍රකාශ කළාය.

අගමැතිනි හරිනි අමරසූරිය මෙනෙවිය මේ බව සඳහන් කළේ  අකුරණ දී පැවැති රැස්වීමකදීය. ජාතික ජන බලවේගයේ මහනුවර දිස්ත්‍රික් අපේක්ෂක රියාස් ෆාරුක් මහතා සංවිධානය කළ මෙම රැස්විමේදී තව දුරටත් අදහස් දැක්වූ අගමැතිනි හරිනි අමරසූරිය මෙනෙවිය මෙසෙද සඳහන් කළාය.

සිංහල දෙමළ මුස්ලිම් සියලු ජනතාව මාලිමාව වටා රොක් වන විට අපේ ප්‍රතිවාදීන් විවිධ දේ කිව්වා.

මුස්ලිම් සහෝදරියන්ගේ හිජාබ් එක ගලවනව කිව්වා. පිරිමින්ගේ රැවුල කපනව කිව්වා. පස් වතාවක් වන්දනා කරන එක තහනම් කරනව කිව්වා. මේවා මුස්ලිම් ජනතාවට කිව්වා බෞද්ධ ජනතාවටත් කතා කිව්වා. පන්සල්වලට දානය දෙන එක නවත්තනව කිව්වා.දළඳා පෙරහැර නවත්තනව කිව්වා .අපි සියලු දෙනාම ආගම ගැන සංවේදියි.අපේ සංස්කෘතිය ගැන සංවේදියි.

ඒකට තර්ජනයක් එනව කිව්වහම ඒක බලෙන් කවුරු හරි වෙනස් කරනව කිව්වම අපි සංවේදි වෙනවා. එහෙම තත්වයක් නිර්මාණය කරන්න ඔවුන් උත්සාහ කරනවා. හැම අවස්ථාවේදීම ජාතිවාදයෙන් ඡන්ද එකතු කරපු ඡන්ද දිනපු අය තමයි මේ පාර පරාජයට පත් වු‍ණේ .ඒ ජාතිවාදි ගැටුම්කාරි දේශපාලන සංස්කෘතිය ඉවර කරනව කියල තීරණය කළේ ජනතාවයි.

මේ රටේ සංස්කෘතින් ගොඩක් තියෙනවා.මුස්ලිම් සිංහල දෙමළ කතෝලික ක්‍රිස්තියානි මැලේ බර්ගර් මේ වගේ ජන කොටස් රාශියක් ඉන්නවා. ඒ හැම ජන කොටසකටම ආගම් තියෙනවා. සංස්කෘතින් තියෙනවා.මේ සියලු දෙනාට ගැළපෙන සමාජයක් අපි හදන්න ඕන.එකිනෙකාට ගරු කරන්න පුළුවන් සමාජයක් හදන්න ඕන.දැන් ජනතාව බය කරන්න හදනවා අපි බලෙන් වෙනස් කරන්න හදනව කියලා අපි බලෙන් මුකුත් වෙනස් කරන්නේ නෑ. ගොල්ල කිව්වා එක රටක් එක නීතියක් කියලා. ඒ ගොල්ල කිව්වේ පාලකයාට එක නීතියක් ජනතාවට එක නීතියක් කියලා .ජනතාවට අදාළ වන නීති ඒ ගොල්ලන්ට අදාළ වෙන්නේ නෑ. මේ රටේ පොදු නීතියක් තියෙනවා.අපි හැමෝම ව්‍යවස්ථාවට යටත්. බලය තියෙන කෙනාට එක නීතියක් බලය නැති කෙනාට තව නීතියක් වෙන්න බෑ.