(සුජිත් හේවාජුලිගේ  සහ  අංජුල මහික වීරරත්න )

ත්‍රස්තවාදය වැළැක්වීමේ (තාවකාලික විධිවිධාන) (සංශෝධන) පනත් කෙටුම්පත පිළිබඳ  දෙවනවර කියවීමේ විවාදය ලබන 22 වැනිදා පැවැත්වීමට පාර්ලිමේන්තු කටයුතු පිළිබඳ කාරක සභාව අද (16) තීරණය කළේය.

පාර්ලිමේන්තු කටයුතු පිළිබඳ කාරක සභාව කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී අද (16) පෙරවරුවේ රැස්විය.

ත්‍රස්තවාදය වැළැක්වීමේ (තාවකාලික විධිවිධාන) (සංශෝධන) පනත් කෙටුම්පත දෙවනවර කියවීමේ විවාදය එදින උදේ 11 සිට පස්වරු 4:30 දක්වා  පැවැත්වීමට නියමිතය.

මේ අතර    ඉඩම් සංවර්ධන ආඥා පනත යටතේ පළ කෙරුණු  2251/48, 2262/50 සහ 2266/5 යන අංක දරන ගැසට්පත්‍ර මගින් පනවන ලද  රෙගුලාසි ලබන 23 වැනිදා උදේ 11 සිට පස්වරු 4:30 දක්වා විවාදයට ගන්නා බව පාර්ලිමේන්තු මහලේකම් ධම්මික දසනායක මහතා පැවසීය.

එකතු කළ අගය මත බදු (සංශෝධන) පනත් කෙටුම්පත    මාර්තු 24 වැනිදා පෙ.ව 11.00 සිට ප.ව 4.30 දක්වා  විවාදයට ගැනීමට නියමිතය.

තවද ආදායම් මතවූ බදු සම්බන්ධයෙන් ද්විත්ව බදුකරණය සහ බදු නොගෙවා මගහැරීම වැළැක්වීම සදහා මෙරට ආණ්ඩුව සහ තුර්කි ජනරජයේ ආණ්ඩුව අතර 2022 ජනවාරි 28 දින ඇති කරගන්නා ලද ගිවිසුමද එදින අනුමත කරගැනීමට  නියමිතය.

පාර්ලිමේන්තුවේ  25 වැනිදා හැර අන් සෑම දිනකම පෙ.ව 10.00- පෙ.ව 11.00 කාලය වාචික පිළිතුරු අපේක්ෂා කරන ප්‍රශ්න සදහා වෙන් කර ඇත. ‍ මාර්තු 25 වැනිදා හැර අනෙක් දිනවල  ප.ව 4.30 සිට ප.ව 4.50 දක්වා සභාව කල්තබන අවස්ථාවේ ප්‍රශ්න සදහා කාලය වෙන්කර  ඇති අතර ප.ව 4.50 සිට 5.30 දක්වා පිළිවෙලින් ආණ්ඩු පක්ෂය සහ විපක්ෂය ඉදිරිපත් කරන යෝජනා  අනුව සභාව කල් තබන අවස්ථාවේ විවාද  පැවැත්වීමටද තීරණය විය.