(සුජිත් හේවාජුලිගේ )

රජය පෞද්ගලීකරණය කරන ආයතන ලැයිස්තුවට  විශාල වශයෙන් ලාබ ලබන ශ්‍රී ලංකා රක්ෂණ සංස්ථාව සහ ශ්‍රී ලංකාටෙලිකොම් යන ආයතනද ඇතුළත් කර ඇති බවත්  ලාභ ලබන ආයතන පෞද්ගලීකරණය කිරීමට සමගි ජන බලවේගය පක්ෂය විරුද්ධ බවත්  විපක්ෂයේ ප්‍රධාන සංවිධායක පාර්ලිමේන්තු මන්ත්‍රී නීතිඥ ලක්ෂ්මන් කිරිඇල්ල මහතා පැවසීය.

කෙසේ වෙතත් විශාල වශයෙන් පාඩු ලබන ශ්‍රී ලංකන් එයාර්  වැනි ආයතන සම්බන්ධයෙන් යම් ක්‍රියාමාර්ගයක් ගැනීමට විරෝධතාවක් නැති බව සඳහන් කළ මන්ත්‍රීවරයා  ඒ  සම්බන්ධයෙන් පාර්ලිමේන්තුවේදී සාකච්ඡා කර යම් තීරණයක් ගැනීමට හැකියාව පවතින බවද  ප්‍රකාශ කළේය.

පාඩු ලබන ආයතන වුණත් පෞද්ගලීකරණය කරන්නේ නම් ඒවායේ සේවකයන්ට සිදුවන්නේ කුමක් දැයි සහ  ඔවුනට වන්දි ගෙවන ආකාරය යනාදී දේවල් සම්බන්ධයෙන් පාර්ලිමේන්තුවේදී   සාකච්ඡා කිරීමට අවස්ථාවක් ලබා දිය යුතු බවද  ඔහු සඳහන් කළේය.

එසේම ඒවායේ  ප්‍රතිව්‍යුහගත  කටයුතු විනිවිදභාවයෙන් සිදුවිය යුතු බවද  ලක්ෂ්මන් කිරිඇල්ල මහතා පෙන්වා දුන්නේය.

ජනාධිපති රනිල් වික්‍රමසිංහ මහතා මහතා "ද ඉකොනොමිස්ට්" සඟරාවට ප්‍රකාශයක් කරමින්  ටෙලිකොම් සහ ශ්‍රී ලංකා රක්ෂණ සංස්ථාවද පෞද්ගලීකරණය කළ හැකි බව ප්‍රකාශ කර ඇතැයි විපක්ෂයේ ප්‍රධාන සංවිධායකවරයා වැඩිදුරටත් පැවසීය.