ඡන්දය නොතියන්නේ ඡන්ද නැති නිසායි

(ඩයනා උදයංගනී)

ආණ්ඩුව මැතිවරණ නොපවත්වන්නේ මුදල් නොමැති නිසා නොව ඡන්ද නොමැති නිසා යැයි පිවිතුරු හෙළ උරුමයේ නායක, පාර්ලිමේන්තු මන්ත්‍රී උදය ගම්මන්පිල මහතා පැවසීය.

ජනාධිපති රනිල් වික්‍රමසිංහ මහතා තම මන්දා මාමාගේ අඩි පාරේ යමින් මැතිවරණ සිතියම අකුලන්නට තීරණය කර ඇති බවත්, ආණ්ඩුව මැතිවරණ නොදෙන නිසා එය ලබාගැනීමට කටයුතු කළ යුතු බවත් ගම්මන්පිල මහතා සඳහන් කළේය.

ඔහු මේ බව පැවසුවේ කොළඹ දී ඊයේ (14) පැවති මාධ්‍ය හමුවක් අමතමිනි.

මෙහි නීතිමය ගැටලුවක් ද ඇතැයි කී මන්ත්‍රීවරයා අයවැයෙන් මැතිවරණයට වෙන්කළ මුදල ලබාදීමට ආණ්ඩුවට නොහැකිවීම අයවැය පැරදුණා හා සමාන බව ද කීවේය.

අයවැය පරාජයට පත් වුවහොත් ආණ්ඩුව ඉල්ලා අස්විය යුතු බැවින් අයවැය ක්‍රියාත්මක කරන්නට නොහැකි බව ප්‍රායෝගිකව ඔප්පු කළ ආණ්ඩුව අයවැය පරාජය වුණා සේ සලකා වහාම ඉල්ලා අස්විය යුතු බව ද ගම්මන්පිල මහතා පැවසීය.